Chhattisgarh nung tenla ki amak; Laishiba rongdoktsü

Raipur, April 19 (Agencies) : Chhattisgarh kübok Bastar district nung mejangjatetba nisung anati tenla ki ka amak aser Laishiba ka den tanga oset kar mi agi rongdoktsüba sülen sannüker aser pa kinungtsü dak teka sangshi, ta Mongulbarnü police-i metetdaktsü.
Iba tatalokba ya Deobar nikongtsütsü Karanji Matagudi Para yimtsüng nung atalok.
“Pastor Deenbandhu Sameli-i tezüluba nung ken o agütsüba nung ajemdaker FIR ka benokogo. Iba tesem nung police-i mita odar aser kobi melii aibelenertem aputsü imlar” ta Bastar Superintendent of Police, RN Dash-i ashi.
Mejangjatetba nisung ana jagi tena Khristan yimsü amangba telok tanga ka nungi ta ashi aser tenati tenla kidang sarasademnür ta shir tenla ki telungi ai. Tena tenla ki telungi aiba sülen sannüker dak azük aser Temeshi Laishiba ka nung, menden aser temeket aliba osettem nung totzü shiloktsür mi senoktsü, ta FIR nung shia lir.
Iba osang angashili police tesem tonga ao aser aonung piyong tenla ki anüktsü atema police ka nem mapa lemzükja liasü, ta Dash-isa ashi.
Chhattisgarh nung Christian Forum tir, Arun Pannalal-i iba mapaji Bajrang Dal züngsemtemi inyak aser police-i parnok miimbangtsütsü meranger ta tai tongloktsüogo.
“Iba tesem nung tang agi tasembenbuba Khristan tamangertem anema mapa inyaker. Taoba Deobar inyakba mapaji Bajrang dal puri inyakba liasü” ta Pannalal-i ashi.
Nisung ana jagi sannüker Deenanath aser pa kinungtsü Meena (mashisa lir) dak teka sangshi aser tena daka mi senoktsütsü merang saka tena jenbu, ta Pannalal-isa ashi.