Chhattisgarh sorkari Maoists den keno jembitsü melunger

Raipur, October 23 (Agencies): Deobarnü Chhattisgarh sorkari, democracy aser linük temzüng kübok ajemdaker Maoists telungpurtem den ken o jembitsü melunga lir, ta metetdaktsüogo.
Tanü state Home Minister, Ramsewak Paikra-i sangdong ka ajanga, “Democracy indang tajemdakdakji ken o jembiba lir. Telungpur tebilemtsü bentettsü atema state sorkari Maoists densema ajak den ken o jembitsü melunga lir,” ta metetdaktsü.
“Telungpurtem den ken o jembitsü atema sorkar kishi teti lapoka dang lir, ajisüaka ibaji democracy aser linük temzüng nung ajemdaker asütsüla,” ta paisa ashi.
Minister-i ashiba agi, tamalena Chief Minister, Raman Singh-i, telungpurtemi raraba osettem toktsüra sorkari telungpurtem den jembitsü melunga lir ta aiben shiogo.
Pai ashiba agi, state sorkari temai adoker Maoists telungpurtem taküm piyong anisüngzüka alitsü asoshi parnok nem teyari balala agütsütsü sorkari renema lir.
“Maoists tebilemtsü teti atema bentettsü atema sorkar inyakyim aser nükjidongji tejangja,” ta paisa shisem.
Hokolbarnü Supreme Court-i Centre aser Chhattisgarh sorkar na dang state nung Maoist rara anentsü atema yimjung ken o atema inyakang ta metetdakja liasü.