Chhota Rajan CBI ket nung agütsüogo

New Delhi, November 07 (Agencies): Tanü New Delhi nung aliba court kati telungpur tetsüdi, Chhota Rajan CBI ket nung agütsüogo.
Küm 27 tashi linük balala nung jenshia alisang arishi küm 55 Rajan shitakba tenüngbo Rajendra Sadashiv Nikalje lir, aser yakonung pa Indonesia, Bali nungi anir aruba sülen anogo ka lir security kuli ajanga CBI headquarters nung magistrate kati ken o angadangba sülen CBI ket nung agütsüogo.
“Rajan anema benoka aliba ken o aika rongnung ken o ka atema onok (CBI) ket nung pa lir,” ta CBI otongdar kati ashi.
Rajan ya mapang ka nungbo Dawood Ibrahim den kanga atongsema inyaka liasü.
Delhi aser Mumbai na nung nisung tepsetba, temesepba mozü shibelenba aser rakzükraktemba ken o 70 dak tema pa anema benoka lir.
Yashi pa CBI headquarters-i anir aoba sülen pa dang asüngdangyaogo.
October 25 nü Indonesia, Bali nung police-i pa apuba sülen India ketdangsertemi tekaraba nung pa linüki anir arutsü atema inyaktepa liasü.
Pa New Delhi tonga anir aruba sülen CBI, Interpol division-i anir ao.