Chhota Rajan Delhi tonga anir aruogo

Mumbai/New Delhi, November 06 (Agencies): India nunger telungpur tetsüdi, Chhota Rajan Indonesia linük nungi New Delhi tonga anir aruogo aser pai kiralongrar Dawood Ibrahim den tesentaktep lia tongtepratepa alir Mumbai police ketdangser tenüng kar jungkai adoka shiogo, ta osang angazüker.
Tamalen Rajan-i, Mumbai police ketdangser kar Dawood Ibrahim den tesentaktep lir aser pa dang asüngdangyaba mapang Centre sorkari ibaji temulung nung yua alitsüla, ta jembia liasü. Taoba mapang nung Mumbai police-i pa kanga reshikangshiogo, ta paisa shiogo.
Mumbai nung asosang, Chhota Rajan ya India nung nisung tepsetba, temesepba mozü shibelenba aser rakzükraktemba ken o 75 dak tema pa anema benoka lir.
October 25, 2015 nü pa Australia nungi tayimtsü ajanga Indonesia atongba mapang Bali nung aliba police-i pa apu.
Mumbai Police-i pa anema ken o 70 shi benoka lir. Item ken o rongnung nisung tepsetba ken o 20, Terrorist and Disruptive Activities (Prevention) Act kübok ken o pezü aser Prevention of Terrorism Act kübok ken o ka lir.
Ano Maharashtra Control of Organised Crime Act kübok-a pa anema ken o 20 benoka lir.
Rajan ya Brihostibar nü Indonesia nungi Indian Air Force tayimtsü ka nung India-i anir arua liasü.
Rajan tayimtsüi ayaketa atuba mapang osangbenertem senden ka nung Mumbai police tongti, Ahmad Javed-i, “Rajan anema benoka aliba ken o ajakji CBI ket nung agütsür, kechiyong linük aika dak sentaka aliba ken o bentettsüsa CBI-i aika ajangshia lir,” ta metetdaktsü.
Tanü Hokolbar nü CBI ketdangsertem Mumbai city police headquarters-i oa police commissioner, Ahmed Javed ajurua liasü.
CBI ketdangsertemisa police senior ketdangsertem ajurua Rajan anema benokba ken o kakettem nung o lemtetpsüa akok. Tang item kakettemji local police ket nung lir, ta osang ka ajanga ashi.
“City police-i Rajan anema bendenba kulitem aser kakettem ajakji CBI nem agütsütsü,” ta police ketdangser kati ashi.
Chhota Rajan anema bushisüngdangba nung Mumbai police-ibo shilem kecha magitsü, ajisüaka CBI-i parnok teyari nüngdakra parnokia yarisemtsü, ta ano police ketdangser kati ashi.