Chibok tsürtemi pei kinüngertem den ajurutepogo

Abuja, October 17 (Agencies): Nigeria sorkar anema nokdakba kiralongrar telok, Boko Haram-i taoba hopta chiokba Chibok tetsür chanu 21-i par tsürabur aser kinüngertem den yashi, Deobar nü ajurutepogo.
Boko Haram teloki Nigeria northeast tsütsü, Borno state kübok Chibok district nung tentetba kaketreju balala nungi tetsür chanu 200 shi tashiyim agi 2014 küm pua anir aoba sülen par teloki tetsür 21-ji tawa chioka liasü.
International Red Cross aser Switzerland sorkar nati ayonger külen Nigeria sorkar aser Boko Haram telok na tsüngda jembiteptsü tenzükba sülen par teloki tetsür 21-ji taoba hopta chiok.
Tetsür chanutemji taoba Brehostibar nü chiokba sülen parnok Nigeria yimtiba, Abuja tonga anir ao saka par tsüraburtem linük tezülen aliba yong parnoki pei tanurtem den yashi, Deobar nü ang ajurutepa liasü.
“Onok taküm kümzüka anitettsü asoshi nungdakba maparen inyakba atema ajak dang kanga pelar. Ni joko ozü tsürabur den tanaben ajuruteptsü maongka mangutsü ta bilema liasü. Ajisüaka, Tsüngremi lenmang lapoktsüba ajanga tanü ni ozü tsürabur aser kinünger den asangsang nung ajuruteper lir,” ta tan chiokba tetsür chanutem rong nung densemer, Rebecca Mallam-i metetdaktsü.
Boko Haram teloki tashiyim agi pua anir aotsü tenzükba sülen ghonda ishika tsüngda nung tetsür kati jenteta la taküm kümzüka liasü saka taoba hopta chiokba sülena Boko Haram teloki maneni tetsür chanu 197 tashi tanga tashiyim agi pua yua lir.
Tanüngba tetsür chanutem taküm kümzüka anitettsü atema Boko Haram telok den maneni jembiba osang ka Nigeria sorkaria metetdaktsüogo.
Boko Haram teloki küm 7 tejaklen nungi tenzüka, Nigeria sorkar den tongpang raraba den külemi, kidangsü aliba linüktem nung lendong balala kanga sashia atalokdaktsüba ajanga tanü tashi nung nisung meyirijang jenti tepsetba den nisung million 2 dak temai pei talidak toktsür tesem balala nung jenoka alitsüsa tia bener arutsüogo.
Nigeria-ia kidangsüa aliba linüktem den aroki lungjemer Boko Haram teloki tesepti, Sambisa arem nung kiralongrar mita amaktsü maparen kanga sashia inyakba osang bushiteta lir.