Chichia Mangyimer

Prince Philip-i tejangraba tulu nung Britain linük tenzükogo, anungji pa asüba ya Queen Elizabeth II atema dang masü saka linük atema-a takoksa tulu. Duke of Edinburgh, Prince Philip arrshi küm 100 ajungtsü ita asem dang lia April 09, 2021 nü alima nungi pilaba sülen Queen aser tamarener kibongi dang masü saka linük nübur ajaki mangyimer, kechiyong pa atura mapang  pai nübur tajungtiba agi tenzükogo. Queen arrshi küm 94 lia la kinüngbui la toktsür asür. World War II mapang nung pai tongbang aika nung shilem agia liasü, talisa pa arrshi küm 19 dang asüdang 1941 küm March 28 nü Greece tzükümlen nungi pilar Cape Matapan nung Italy nunger navy rong aika tzüyim telungi idaktsüba otsü mamateter. Tenteta aliba rejutem aser chuba yimlitem nunga temelenshi maneni alitsü aser Queen-a mapang ka nungbo süadoktsü. Lenirtem süadokba mapang nung ozüng ama linük nübur ajaki mangyimtsü atema sangdonger, saka lenir jagi akümli mapang nung nübur junga tenzüka ali nung ang nüburtemi chichia mangyimer, ajioda Britain nungeri atangji pa asüba atema chichia mangyimer. Prince Philip-i temelungtetba tulu nung linük tenzük aser World War II nung pai kanga tasü itta raraba ajanga Navy nung tanubortem rongnungi First Lieutenants jenjang angur rongnung pa densema liasü. Akhidang nungi tamarener kibongi yimsüsüba reju ka nung pa ajemok. Pai linük atema tongbang nung nokdakba sülen maneni tejangraba tulu nung linük nüburtem tajungtiba agi tenzükbaji tarutsü lanu putuia mamatoktsü. Pa akümli mapang nung pai Duke of Edinburgh Award Scheme tenzüktsü aser iba scheme kübok 1956 küm nungi tenzüka nüburtem tenzüktsü asoshi alima tesem ajungalen lanur million aika nem maongka agütsüogo. Paisa British engineering & science ajungkettsütsü atema inyak aser temeim mapa balala inyaktsü atema tenla aika agüja liasü. Pa kijai nüburtem atema maparen 22,000 dak tema inyaktsüba sülen arrshi küm 96 lia pai tenzükba wadang nungi anisüngzüka liasü. Pai küm 70 dak tema linük tenzüka aruaka pai pa asüpila sentongjibo kanga tongmelang agi dang agidaktsünüa liasü. UK nung nüburtemi anogo aika dang masü saka küm aika mangyimtsü. Tanü alima nung lenirtem aikati pei khuret mangateti pei atema dang bilema inyakba agi nüburtem okronger. Ajisüaka lenir karibo pei nübur taküm jenjang ajungkettsütsü aser alima tajungba akümtsü atema nübo, shisatsü, sempet aser rongsen ajak tenla agüja tenzüker, aser item ama lenirtemjibo süadokaka alimai mamateter. Prince Philip asüba osang sangdongba sülen alima nung alirtemi pa akaba ali, kiojen aser rongsen indang meshisadanger, saka pai nübur koma tenzük?, ta metetnüa pa taküm otsü bushia züngdanger. Pei koloki shisatetba ajak agi nüburtem bendanga tenzükba ajanga nüburtem lireptsüka lidaktsüba lenirtemji nüburtem asoshi temoatsü tulu rongnung ka asütsü.