Chichiba Khristmas

~ Toshimenba, Viola Colony, Dimapur.

Küm shia asenoki asen kümtetdakba ‘Yisu” asoba benjongmong amonger aser asen akaba aser metetba tajungtiba agi kinunger, medemer, kiyonger den lemsateper, Asen taküm ya küm songtema tanur aser semchirsemnor atema schools, colleges aser mapa balala atema mazüngi alir, aser yipru ama aritepa küm shia ‘Khristmas’ süia oadoker.
Khristmas mapang aiben asenoki chiyungtsü tajung, süoshi tajung aser sempet balala agütsütepa lemsateper aser medemer, kiyonger, kinungertem adianutem aser neburtem den pelateper, iba ji kanga dang nüngdak aser tim mapa lir.
Kar atema iba Khristmas ya tepela tulutiba kibong tasen, küm tsungda mapa balala nung takok tulu, aser rongsen lenmang aika ajangzükba asütsü akok, saka aika atema temenungratsü ka jabaso, jala, tetsü, tebu mesura medemer, kinunger tajungtiba samar temulung zürepa Khristmas asütsü akok. Kechi tia aser jenjang nung lidir liaka asenoki sarasadema agizükdi.
Aiben Khristma atongdang asen lanuwa mapang medemer, kinunger, kiyonger aser yimer adianu den pelatepba aser lemsatepba menungra bilemteter, aser iba mapang to kodanga meyipa marutsü.
Takar nisung ka kenü Khristmas mapang ka par kilem-kolak nung mener penzüa pa tsüngsem (shoes) temulung masüba indang nemjema liasü, iba kasa mapang nungji tsüngtsüker ka par ki anasa suia-oa angu, iba mapang nungji iba nisungbaji temulung nung kongshi, “Nibo tsüngsem indang bilemer saka pabo tetsüng tamajung,” iba lima nung meimchir aika asen den tekupokba jenjang nung lir ta bilemtetdi.
Bethlehem aser Nashi ki kong Yisu aso aji penzüa bilemdang asenoki teti asen mulungjang nung ‘Yisu’ iba lima yagi ni aser na temenen nungi kümzüktsü, tepoudak alir chioktsü, lajar aser alar aser teküpboktiba jenjang nung alir ajungketsütsü aru ta bilemtetdi. Süra Khristan ka ama asenokia koda alir? Iba amaji melitetra, asenoki iba Khristmas nung Yisu dang shidi, kü mulungjang nung kongshiang aser iba jagi onok taküm, kibong aser loktitiba nung tepela tesünep aser yimjung adokdakjang.
Chichiba bendanga agütsüba Khristan ka asoshibo ‘Khristmas’ anogoji dang masü saka pa/la mulungjang nung anogo shia Khristmas amonger. Iba Khristmas ya asenok ajaki kati ka dang tai toktepba Khristmas südaktsüdi ta ayongzüker. Tatem nung ajak dangi tepela Khristmas den küm tasen salem abener.