Chichiba tangatetba agi vote agütsütsüla: Meira Kumar

New Delhi, June 25 (Agencies): Congress-i aniba opposition party temi shimba Tir candidate, Meira Kumar-i tanü MP tem aseer MLA tem dang, yimtenren nung ajangzüktsü atema masü saka pei mulungjang nungi chichiba tangatetba agi vote agüjang, ta mepishi.
Taoba mapang Lok Sabha Speaker, Kumar-i, Linük Temzüng nung aliba ozüngtem benoktsü atema Tir mendenji kanga tongtibang, aser iba akhümketji wazüka ayutsüla. Anungji ibaji (Tir menden) yimtenren tajangzük angutsü atema mamshitettsü,” ta ashi.
1974 küm Tir election nung VV Giri atema nüboyimja taoba mapang Ato kilonser, Indira Gandhi-i jembiba o lepshia Kumar-i, “Tang mapang ya, chichiba tangatetba nung ajemdaker inyaktsü mapang ka lir,” ta ashi.
Tir election atema tenüng magütsüdang yongi lai Electoral College nung züngsemtem dang iba temepishiba agütsüogo. Lai June 28 nü tenüng agütsütsü südi, ta bilemer.
Laisa, India nung tongti shilem ana- British nunger yimsüsüba nung salatsü atema raraba aser caste system anema raraba nung la densemba atema lai la kanga tia kar, ta ashi.
“Item rara ana ya ajanga kü shisatsü aser mapatem nung kanga kongshi,” ta lai asü.
Yimtenren party balala nungi tangatetba balala süaka India tenteter lenirtem nungi lai tatishitsü tajung angu, ta laisa ashi.
Kumar-isa, Tiri tenangzükba agibaji India nunger democracy tongtiret- linük Temzüng kümzüka ayutsü atema lir, ta metetdaktsü.
“Democracy inyakyimtem tashi itdaktstsü atema ni aser aika ajungmesobaji iba Temzüng ya lir. Timtem aser terata mapang nung iba (Temzüng) ya ajanga asenok len ania ajungketogo,” ta laisa shisem.