Kohima, February 28 (TYO) : Deobarnü Local ground Kohima nung Transformation Crusade, Kohima anogo pungububa sentong nung nisung meyirjang ter shi Tsüngrem külemtsü atema arua aden.
Tanü sentong nung tongti o jembirji Rev. Zotuo Kiewhuo liasü aser pai tekülem indang onük jembi.
Asenoki atangji külemba ajanga temoatsü aika angur aser asenok temulungjang ka aser tanela ka Yisu nem mesasai dang agütsütsüla, ta Rev. Zotuo-i ayongzük.
“Ken atenba, tenla agütsüba, sayutsüngiba, sarasademba ama yimya balala ajanga Tsüngrem külemer. Yohan 4:23 nung ashiba agi, chichiba tekülemer ka jagi ochi aser tanela nung Tsüngrem külemer aser Satan-i chichiba tekülemer tsübur ta shia lir. Ano Tenüngsang Ken 148 nunga Tsüngremi yangluba ajaki pa nem tenüngsang agüja külemer ta shia lir. Anungji nai Tsüngrem külemdang, nü temulungjang aser tanela ajak agi külemang aser nai mapang timba agüja külemba ajanga nai Tsüngrem tali angatettsü aser pa den anasaba akümtsü” ta o jembirisa tesentepertem ayongzük.
Sentong nung mendenji Khrieneiu liasü aser Saneilie Venyo-i temoatsü meshia sarasadem.
Tanü anüngdang agiba sentong nung Kohima Bible Collegenung Lecturer aser ‘Satanism; Naga teens and Devil worship’ kaketzülur Mezhiisevi Zutso-i Satan külemba aser temenen tanelai amshiba indang onük jembi.
You must be logged in to post a comment Login