‘Chichiba Tembar’ ta ser tanurtem kaket ka sayaogo

Dimapur, June 19 (TYO): Moanaro Imchen-i züluba ‘Chichiba Tembar’ ta ser tanurtem kaket ka Kumlong Baptist Arogo sannüker Rev I Lima Jamir-i sayatsü.
Chichiba Tembar kaket ya Heritage Publishing House, Dimapur ajanga publish asü aser Moanaro Imchen-i züluba mezüngbuba kaket lir. La ya KBA nung Christian Education Ministry Associate Pastor inyaker.
Arogo toklang tenzüker ka ama mazüngi dang liaka Khristan kaket züluba atema Rev Lima Jamir-i Moanaro Imchen nem tenüngsang agütsü.
Iba kaket ajanga tazüngertem ajungmesotsü aser Khristan tesayubatem agütsütsü imlar, ta paisa ashi.
Sentong nung Moanaro-i o jembidang, lai tanurtem asoshi Khristan tesayuba aser Tsüngrem temeim indang kaket ka zülutsü kanga jangraa liasü, ta ashi.
Tanurtem ministry nung inyakdang, lai aika angazük aser ajangshia aru. Talisa tanü-asüng tanurtemi kaket azüngtsü melena gadget tem ang amshitsü jangraba ajitet, ta laisa ashi.
Iba jagi lai tanurtem kaket azüngtsü jangradaktsütsü aser tanurtemi Khristan tesayubatem angazükdaktsütsü atema kaket ka zülutsü mulungtet. Iba kaket den atongtepba kaket ka ita ishika lir adoktsü, ta Moanaro-isa shisem.
Laisa lar tesayartem Rev C Walu Waling aser Temjen Tzudir na dang pelaba metetdaktsü.
Sentong nung Ao Senden Literature Board Secretary, Temjen Tzudir-i kaket indang okila jembidang, iba kaket ya tanurtem atema dang masü saka tsüraburtem atema tajung lir ta ashi.
Chichiba Tembar ya Duluba aser Lisemba ta ser medemer ana indang otsü lir. Iba kaket indang jenjang ya sen 180 lir aser Mokokchung nung aliba bookstalls nung angutsü.