Chidambaram-i totzü jenjang atuba dak sendakba nung Centre sorkari aitsü

New Delhi, Rongjui/September 4 (Agencies): Linük nung petrol aser diesel jenjang tali akümba ya saru tali saruba ajanga lir ta shia Congress lenir tejen P Chidambaram-i Sangtennü NDA sorkar aitsüogo. Tweet tem ajanga taoba finance minister-i petrol aser diesel ya GST küboki bener aittsü asoshi khangogo.
“Petrol aser diesel jenjang tali akümba ya mepaitoktepba maparen ka masü, kechiyong iba jenjang ya petrol aser diesel nung saru tali agiba ajanga lir. Saru tajemba kümdaktsüra jenjang ajema akümtsü,” ta pai ashi.
Chidambaram-isa, iba dak sendakba nung Centre sorkari state dak atonger koba tashioktsüba ka li, ta ashi.
“BJP puri, parnoki state 19 nung yimsü südar ta amadoker. Petrol aser Diesel GST küboki bener aittsü asoshi Centre aser state tem longjemer inyaktsüla. Congress puri petrol aser Diesel ya GST küboki tangsa tang bener aittsü akhanger,” ta pai tweet asü.
Linük nung Tentonü petrol aser diesel jenjang timtiba aküm aser iba ya rupee jenjang tajemba akümba aser crude oil rate ajungbena timba akümba ajanga lir.
Delhi nung petrol jenjang sen 79.15 aküm aser diesel jenjang 71.15 aküm.
Iba den külemi Tentonü totzü liter ka nung paise 31 ajungket. Monupi/May 29 nü petrol jenjang 78.43 akümba tang sen ajungketba ajanga ajatetogo. Iba anogo Mumbai nung totzü liter ka nung sen 86.24 liasü.
Tentonü Mumbai nung petrol liter ka nung sen 86.5 liasü.