Chief Justice of India Dipak Misra shim

New Delhi, August 08 (Agencies): Mongolbarnü sorkari Supreme Court nung Justice Dipak Misra, Chief Justice of India shimogo, ta Law Ministry-i   metetdaktsü.

Justice Misra ya India nung 45buba Chief Justice asütsü, aser pai August 27 nü tang teinyakdak CJI, JS Khehar melentsü.

Justice Misra-i ita 14 shi Chief Justice of India inyaktsü, kechiyong pa 2018 October 02 nü mapa nungi anisüngzüktsü.

Justice Misra ya 2011 küm October ita nung Delhi High Court nungi Supreme Court judge shima liasü.

Arishi küm 63 Justice Misra-i CJI mapa agizükba sülen pa kübok tongtibang ken otem rongnung Ayodhya Ram Mandir aser Babri Masjid ken o, Cauvery ayong tzü mangatettep ken o, SEBI- Sahara payment ken o, BCCI reforms aser Panama Paper ken o tem akatsü.

Odisha nungi Chief Justice of India inyaker tasembubaji pa asü. Tamalen state nungi  Justice Ranganath Misra aser Justice GB Pattanaik nata CJI inyaka liasü.

Justice Misra ya 1977 küm advocate akümba sülen Orissa High Court nung practice asü, iba sülen High Court bench nung inyak.

1996 küm January nung pa Orissa High Court nung Additional Judge shim, iba sülen 1997 küm March ita nung Madhya Pradesh High Court nung inyak.

2009 küm Justice Misra Patna High Court nung Chief Justice shim aser 2010 küm May ita nung Delhi High Court nung Chief Justice shim, aser tesüsa 2011 küm October ita nung Supreme Court Judge shim.