Chief Minister-i ANSCU dang nangzük

Dimapur, December 18 (TYO): Nagaland chief minister-i December 19, 2017 tashi nung scholarship magütsüi aliba agütsütsü ta nangzük aser iba atema pelar ta All Nagaland College Students’ Union (ANCSU)-i metetdaktsü.
Chief minister-isa scholarship scheme ajak atema cell/nodal department balaka tentettsü atema lenmang bushitsü aser küm shia mapang ka nung kaketshirtemi scholarship angutsü atema mapa inyaktsü ta nangzük.
August 11, 2016 aser October 26, 2017 Office Memorandum tem meyipa agitsübaji taruba cabinet senden nungang benoka jembitsü ta paisa ANCSU mendenpurtem dang nangzük.
“Yimsüsürtem mesüra cabinet-i ANCSU takhangbatem anema nokdakra aser sorkar akhangba ama meinyakra ANCSU-i anema apusotsü aser iba tebilemtsüji onoki mabentsü” ta ANCSU President, Katho P Awomi-i ashi.
ANCSU-isa telok aser kijatem dang osang tejangja memeteti post-matric scholarship indang osang meprokshitsü mepishia metetdaktsür, kechiyong ibaji ajanga central ministry nung temulung melemtep alitsü aser senotsü agütsüba yimya melenshia tetsükdaktsü ajurutsü akok, ta ANCSU President-isa metetdaktsü.