Chief Minister Neiphiu Rio dang onsara pelar

~ Dr Toshimanen Ozukum, Kohima.

Nagaland State ngur küm 57 süia ogo. Mapang mapang shia Chief Minister melentepa inyakaa aruogo, parnok ajaki pei kolok yari aser pei mangdang yari Naga nunger yaia aruogo. PRNOK ajak dang onsara pelar.
Aji saka tang teinyakdak Chief Minister Neiphiu Rio ya keni balaka sottba ta bilemer pa mezüngbuba lokti tenzüktsü apusobaji Chiephobozou Area Council Chairman liasü. Jeep ka nung mener arua Kohima District Planning and Development Board nung par area develoment indang teburji o benoka jimpiba ni kanga junga bilemteter,
Yamaji pa küm aika Nagaland Chief Minis inyaka arudagi. Küm shia sentong tajung balala agi Naga nunger tejakleni anitsü meranga inyakba atema pa tang kangsa pelar.
Tsüngremi agütsüba shisa tajung ajanga October 14, 2019 nung CHIEF MINISTER MERITORIOUS STUDENTS FELLOWSHIP ya tenzük. Iba ya ajanga Nagaland Board of School Education Class X Exam nung tematiba jenjang angur 50 nem Rs 50,000/- cash den Certificate tajung yanglua agütsütsü nukjidong nung ya tenzük.
Iba sentong ya January 31,2020 Capital Convention Center Kohima nung agia liasu. Tia kaa nia iba sentong nung adentsü maongka angu. Ibaji ya : Küdi tambusang asür M Chuba Ozüküm jabaso Tulumatsünger chir Wangshitemjen Ozüküm pai top number one ngutet. Iba sempet agizüktsü pa marutet nung ni agizüktsütsü maongka angu.
Pa top number one anguba küli kar : Pa schooli aoba küm nungi tenzüka top top tang nguyonga class X atong. Kodang Class X final exam routine adok ni Mokokchung nung par kidangi ao. Tetsü Obangla aser tebu Tulumatsüng liasu.Anungji Wangshitemjen tenu tetsür ana par asem anidener Laishiba Apijemtsü 1:7 lapoker ni zünga ashi” KIBUBA TSÜBUBAJI TEMETETBA SHISATSÜ TETENZÜK” Semchir Wangshiba nai ya tenok tenoka amanga lesson merenga züngang. Na top number one nung adoktsü Obulai sarasademdi ta shir nemeta sarasadem. Iba sülen ni ya pa dang ashi” Nai Tsüngrem dak amanga maneni sarasadema zünger top number one adoker yamai temoatzü angutsü. Governor award, Mangyangnokcha Award,Chief Minister Award, asen yimer Academic Excellence award etc etc..Yamaji award sen agi na College züngtettsü.
Iba sülen ni Kohimai meyiba arur kü temein kinungtsü aser ozü jabaso jala aser kidang alir ajak senteper aonung sarasadem agiba mapang Wangshitemjen taküm Class X exam nung top number one adokdakjang ta anepdang aonung sarasadm agiba mapang ajak nug ni anir maneni sarasadem. Iba den ano Kononia Dawn Prayer nung anepdng shia 5-6 am nung sarasadema liasü.
Tesüngmangtsüka kadang Class X result adok ni lemang nung lia kü temeim kinungtsüi Tsüngrem tenüng sangang Wangshitemjento top number one nung adokogo ta ashi. Idangji ni gari anener tepela agi nüktzü yima Teyanglur Tsüngem tenüng sanga sarasadem. Iba ya tamang agi sarasademba ochi kuli lir.
Chief Ministerbai iba CMMSF indang ashidang Kaketshirtem temolung atangtsü onük ka shisembaji ya ” NENOK TANG TOPPER RONGNUG TENAKA NENOKI MERANGA MEZÜNGRA BOTTOMI ALUTSÜ.” Anungji ano maneni meranga zünger temaba jenjang nükjidong maneni yuang ta tesenteper aser kaketshirtem ajak temolung nung kongshia jembi. Iba CMMSF nung tebor tajung kaji ya: Kakershirtem nisung 50 shirnoki iba sempet tajung nguogo parnok zünga aodang küm 5 tashi küm shia shirnoki küm tatem tatidng nung 80% above ngudir parnok ajak nem iba tetushi sempet agütsütsü. Aji saka kodang 80% tekübok ngudir idangji iba tetushi sempet anenadoktsü.
Tatemsa asenok Ao kin asoshi tepelatsü osang kaji iba CMMSF sempet angur asen Aor paenok 16 lir. Iba ya koda temoatsü tulu Teyanglur Tsüngremi asnok nem meküploktsüogo ta joka tua asenoki Tsüngrem tenüng sanga pelateptsü tim ta bilema iba tepela osang Tir yimyim azünger ajak den lemsateber. Tsüngremi maojang.