Chief Minister Rio-i ayongzüker

Dimapur, April 11 (TYO): “Alima den külemi asenoki COVID-19 anema raraba mapa nung asenok ajak longjemer noktaktsüla,” ta Nagaland Chief Minister, Neiphiu Rio-i ayongzükogo.
“COVID-19 anema tongti mapa inyakertem, sorkar ketdangsertem, telok balala, village council tem, media nisungtem aser iba mapa nung sendaka alir ajak dang kanga pelar. Nenok ajaki mapa tajung inyakdar aser maneni iba rara nung shilem agitsü ayongzüker” ta paisa ashi.
Tanü asenoki tensa tamajung ka ajurua lir aser nisungtem temulung animesüngzükteti lir. Iba ama tensa ka nung osang tai prokshiba ajanga timtem ajurutsü akok, anungji official osangtem dang angatsü aser item osang külem sensotem den lemsateptsü atema mepishir, ta Rio-isa metetdaktsü.
Yisu Khristai tasüba madak takok anguba bilemteta asenoki teimla aser temeim osang nung ajemdaker Easter Deobar amongdang, Tsüngremi asen nübortem COVID-19 nungi kümzüka ayuba atema Pa nem tenüngsang agütsüdi aser peladi, ta paisa ayongzük.
“Asenoki taküm bendanga agütsüshidi aser Tsüngremi aginüba ama asenok taküm yanglushidi. Osang tejangja metetang, kidang dang mongang aser lendong nungi jenbua liang” ta Rio-isa ashi.