Chief Minister Rio-i Measles-Rubella vaccination tenzüktsü

October 3, 2018 nü Measles-Rubella Vaccination campaign tenzükba sentong nung Chief Minister Neiphiu Rio aser tangartem noksa nung angur.

Kohima, Mongputeni (October) 3 (TYO): Chief Minister Neiphiu Rio-i Bodbarnü Nagaland nung Measles-Rubella Vaccination Campaign (MRVC) tenzüktsüogo.
Tanü nungi tenzüker taruba hopta pungu tashi Nagaland nung ita 9 tain nungi arishi küm 15 tsüngda tanur lakh 4.72 shi nem Measles-Rubella mozü agütsütsü.
“Iba ama mapa ya mission mode nung inyaktsübaji tasak masü saka tamakoktsü lir” ta tanü Dr Neilhouzhü Kire Government Higher Secondary, Seikhazou nung Rio-i sentong tenzüktsüdang ashi.
Social media nung MRVC ajanga tanurtem shirangdaktsür aser timtem agütsütsü ta olulutem prokshiba atema Rio-i ashiba agi, “MR vaccination ya alima ajungalen takok ngua agir aser India nunga state aika nung telemsa ana lemsar campaign takok ngua tembangogo” ta ashi.
“Iba vaccine ya WHO-ia junger ta kuli agütsüogo aser asen tanurtem Measles o Rubella nungi kümzüka ayutsü. Anungji asenok shisabulutsü mali aser osang tiyazü nung mamangtsüla” ta paisa shisem.
Iba campaign ya measles aser rubella nungi jenbua alitsü atema inyaker, anungji tanur ajak nem MR vaccine agütsütsüla, ta Rio-isa ashi.
Measles aser Rubella samatsütsü atema inyakba mapa nung nisung ajaki yariteptsü mepishir. Iba campaign atema sentong kanga junga atongogo aser training o orientation aiben agiogo. Asenoki asen tanurtem meimer aser parnok temang anema lidaktsünür, anungji tsüraburtem aser school ketdangsertemi iba mapa nung yariteptsü mepishir, ta Rio-isa ayongzük.
Chief Minister-isa Arogotem aser NGOs dang campaign indang osang prokshitsü atema mepishi.
Sentong nung Health and Family Welfare Minister, S Pangnyu Phom-i o jembidang, “department-i sorkar department ana- School Education aser Social Welfare den yaritepa Nagaland nung campaign tulu inyaktsü renema lir. Iba mapa atema ita pezü tashi training agiogo” ta ashi.
“Agüja aliba tanurtem nem mozü agütsüra, tashidak tamajung ana samatsütsü aser asen state nung temang anema alibaren tajungba akümtsü” ta Pangnyu-isa ashi.
Measles ya menatepa tashidak ka lir aser 2016 nungi Nagaland nung tanur 27 tashi iba tashidak agi shiranga süogo. Ano Rubella ajanga tanur bena aliba tetsütem aser tanurtem kangshir, ta National Health Mission indang Mission Director, Nagaland, Dr Kevichusa Medikhru-ia ashi.
Asenok den kidangsüa aliba Assam, Manipur, Mizoram aser Arunachal Pradesh state tem dena India kübok state 23 nung iba campaign agiogo, ta paisa ashi.
Taruba hopta pungu tsüngda Nagaland nung iba campaign agitsü. Mezüngbo sorkar aser nija school tem nung agitsü, hopta tasembuba aser pezübuba nung Anganwadi Centre, Sub-Centres, Primary Health Centres aser Community Health Centres nung agitsü ta Dr Kevichusa-isa ashi.
Hopta pungububa nung sweeping campaign agitsü aser iba mapang metongjemba tanurtem bushia mozü agütsütsü, ta paisa shisem.
MR vaccination ya mapang talangka tejakdang nungi agüja arur saka jenjang tasak asüba agi private sector nung dang angu. Ajisüaka Centre sorkar ajanga vaccine ji angati dang agütsütsü, ta Dr Kevichusa-isa metetdaktsü.
Sentong nung School Education Advisor K T Sukhalu aser Rural Development Advisor Dr Neikiesalie Nicky Kire den Health and Family Welfare Department nung ketdangsertem aden.