Chief Minister T.R.Zeliang-i mokdang anentsü mepir

Dimapur, February 13 (TYO) : “Asenok sasa sorkar kümteta aotsü takhangba agüja rarabaji mitkar tashi mesüra tashiyim mapa ajanga tangatettep kati marutettsü ta India sorkari angateta, tang asenok tsüngda olemtep agia telemtetba ka dangi arutsü meranger,” ta Nagaland Chief Minister, T.R. Zeliang-i taonung All India Radio ajanga metetdaktsü.
“Asenok India sorkar kübok lir aser India kübok ali tashi Linük Temzüng nung aliba ama sorkari inyaktsüsa akümer ta ozü sorkari kin telok balala den ajurutepa olemtepdang shiogo. Iba nung tetsür nem shilem 33 lemzükja Urban Local Bodies indang elections agitsüba dena lir,” ta T.R Zeliang-i ashi.
“2006 küm Nagaland Legislative Assembly nung ULBs indang elections agitsü atema yanglushiba onük jembitsü atema 2016 küm sorkari loktitentet balala den ‘consultative meetings’ 14 amen aser sorkarisa tawa tasen tentetba Joint Coordination Committee den January 25 nü kü indang office nung aser January 30 nü Chumukedima nung NBCC lia ajurutepogo,” ta paisa ashi.
JACWR-i Supreme Court nung Arrla 243 T ajanga Arrla 371 A melenzükogo ta Special Leave Petition ka benokba sülen Supreme Court-i Arrla 371 A atema telemtetba ka agitsüba liasü. Telemtetbaji Arrla 371 A nung temeten balaka agüja alibatem anema agütsütsü akok ta asüba tangatetba nung Cabinet-i tetsür nem shilem lemzükja ULBs indang elections agitsü telemtetba agi, ta Nagaland Chief Minister-isa metetdaktsü.
November 16, 2016 nü Capital Convention Hall, Kohima nung kin balala nungi teloktem den senden amendang, Nagaland Municipal Act, 2001 nung aliba onük kar Nagaland nung amshitsü meputep ta ashi aser itemji sorkari agienogo. Tanüa iba kasa Act ji lir aser iba nung sorkari ali, shishilembaba, kiojen amala atema saru magitsü lateta lir. Ajisüaka, nisung kari ULBs indang elections agira, kiset shiruru, aonsotsü aser tsünüsenbongtsü tsünütetba nunga ketdangsertemi saru agitsü ta olulu kar prokshi, ta paisa ashi.
Lungkak aitba teloktem anema menokdaktsü tangatetba nung ozü sorkari parnoki akhangba ama telangzüba agütsüogo. Onoki ULBs indang elections thinena atatsü lemtet aser February 1 nü elections agiba dak sendakba maparen ajak mali kümdaktsüogo. Tetenzük nungi Joint Co-ordination Committee (JCC) ama teloktemi Naga nunger ajak ajangzüktsü atema parnoki kin teloktem den asüngdangya asütsü aser olemteptsü atema mapang meshi. Ajisüaka, tang sorkari ayongba sendentem nung parnoki telok aser kijatem medendaktsütsü atema nokdangbaji tim masü, ta T.R Zeliang-isa shisem.
“Asenoki akhümket kin teloktemtem indang tenüng tajung tajungba kümdaktsütsü aser wazüka ayutsü merangdi aser sorkaribo olemtep alitsü aser shisalemsatep talila alitsü mulunga lir anungji kin teloktemi kecha marendaki sorkar den arua tebilemba lemsateptsüla, “ ta paisa ayongzük.
Tanü Nagaland nung atalokba tensa ya angudang Naga nunger dang masü saka alima ajunga aoksar. Asenoki iba tensa ya moudaktsütsüla kechiyong iba ajanga terata aser mangatettep ang tali adokdaktsür. Asenoki tashitemeteter ama olemtep lia iba tensa tajungba kümdaktsütsüla aser asenoki aginüba ama Nagaland yangerdi, ta paisa mepishia ashi.
“Iba tangatetba nung ni lungkak aitba teloktem dang asen lanu putu atema bilema mapa inyaktsü mepishir. Asenok tsüngda tekong merangtepba ajanga asen tarutsü putu indang tia meraksatsüli. Talisa, nisung kar ajangzüktsü atema masü saka lokti ajangzüktsü atema ang temulung agütsütsüla,” ta paisa metetdaktsü.
Asen jala jabaso meyirjang aika parnok tatidang agütsütsü mapang ka lir. Anungji, ni lungkak aitba telok ajak dang mokdangba agientsü aser kaketshirtem tiptema tatidang agütsüdaktsütsü atema mepishir, ta T.R Zeliang-isa ashi.
Maneni, sorkar mapa inyaker meyirjang aika itasen dak dang metaloker parnok kibongtem alir, anungji parnok office-i aotsü aser itasen agizüktettsü atema aser ano shishilembartema parnok poksüngtsü atema mapa inyaktsü atema mokdangba agientsü mepishir, ta paisa metetdaktsüogo.
“January 31 nü Dimapur nung tapuyutsü taküm ana samaba atema ni kü temulung taroktiba nungi asüku lemsateper aser tasür kibongtem dangi mangyim abener. Tasürtem teti anisüngzük ngudakjangma,” ta Nagaland Chief Minister-isa metetdaktsüogo.