Chief Secretary-i Joint Secretary tem ayongzük

Dimapur, May 18 (TYO) : ATI Conference Hall, Kohima nung Joint Secretary jenjang nung aliba ketdangsertem atema anogo ananü Workshop agiba tanü tembangogo.

Iba sentong nung tongti tesemdangerji Chief Secretary, Pankaj Kumar, IAS liasü aser pai ketdangsertem ayongzüka jembi.

Tanü asen loktiliba kanga tebenja kümogo aser iba ama tensa ka nung ketdangsütsübaji kanga tasak lir. Ketdangsertemi taoba mapang ketdangsüba inyakyim melenshitsüla aser nübortem den amalitepa mapa inyaktsüla, ta Pankaj Kumar-i ashi.

Paisa, ketdangsertem dang pei angatettsü aser pei akokba metetba den pei meketa alirtem kanga junga metettsüla, ta ayongzük.

Iba workshop ya Department of Personnel & Training ajanga ayongzüka agi aser shisalen sayurtemji Secretary, NCERT Sudeshna Sen aser Director Railway Stores(M), Ministry of Railways, Sudhir Kumar Sharma na liasü.

Sentong nung mendenji Director, ATI, Lithrongla G. Chishi liasü aser workshop nung adenertemia o jembia liasü.

Ano, taruba anogo ishika tsüngda Deputy Secretary aser Joint Secretary jenjang nung aliba ketdangsertem atema ATI nung workshop ka agitsü sentong lir.