Chief Secretary-i Land Patta Management System tenzüktsü

Dimapur, October 13 (TYO): NIC Nagaland aser Land Revenue Department külemi yaritepa Land Patta Management System (LaPaMS) tenzükba sentong ka agiogo.
Nagaland state nung Land Record computerized asütsü tenzükba sentongji October 13, 2017 nü Chief Secretary indang Conference Hall, Kohima nung ayonga agi.
LaPaMS tenzüktsüdang Chief Secretary, Pankaj Kumar-i NIC Nagaland nem tenüngsang agütsü.
NIC Nagaland-i iba software yanglu aser pilot District ama Dimapur nung iba mapa mezüng tenzüktsü. Iba mapa ya tanüngba district tem nunga inyaktsü aser iba jagi teinyaktsü wadang tulu lir, ta Pankaj Kumar-i ashi.
Paisa, District Administration aser Land Revenue Department dang külemi yaritepa iba project takok ngua inyaktsü atema ayongzük.
“NIC-i power aser connectivity ama tanga department tem nem infrastructure tenüngdakbatem teyari agütsütsü atema inyakyim ka tenzüktsü nüngdaker. State sorkari Land Revenue Department nem teyari agütsütsü” ta paisa shisem.
Land Patta Management System (LaPaMS) indang software ji Deputy Commissioner indang office tem nung amenoktsü. Iba ya web ajanga amshiba software ka lir aser NIC indang NICNET connectivity alidak ajak nungi amshitettsü.
Iba software ajanga Land Records indang automatic updation asütsü akok aser office maparen tekaraba nung inyaktetba den mapa tashishitsü melii inyaksangshitettsü.
Tanü agiba sentong nung NIC-i powerpoint presentation ka ajanga LaPaMS amshiyim sayua liasü.