Chief Secretary-i Nagaland nung power sector tajungba kümdaktsütsü ayongzük

Kohima, October 9 (TYO) : Association of Power Engineers Nagaland (APEN) züngsemtemi State power sector tsütsü mapa tajungba inyaktsü merangtsüla ta Hokolbarnü Nagaland Chief Secretary Pankaj Kumar-i ayongzük.
Paisa ashiba agi, sorkari kobi melii Nagaland Power Policy ka yanglutsü.
Hokolbar nikongtsütsü de Oriental Grand, Kohima nung aliba APEN general conference 2015 nung Nagaland Chief Secretary tongti tesemdanger liasü.
Pankaj Kumar-i ashiba agi infrastructure tejen aser inyakyim majungba ajanga power department nung timtem aika ajuruyong arudar, ajisüaka APEN züngsemtemi department tajungba kümdaktsütsü aser jenjang yanglushitsü atema inyaktsüla.
Tang power department-i noklang nung shilem 72 takoksa ajurur, anungji tongtipangtiba teinyaktsüji revenue aser distribution asütsüla. Tang Nagaland-i kümshia sen crore 240 agi tangar dang nungi power alia atsüker saka iba nungi sen crore 90 dang bener aruteter. Anungji iba jenjang ya tajungba kümdaktsütsüla, ta Nagaland chief secretary-isa ashi.
Budget nung power department nem peria melemzüktsür ajisüaka power generation & distribution ajanga takoksa angubatem odoktettsü, ta paisa shisem.
Ano, sensosangertem kümzüka ayutsü atema Electrical Inspectorate aser municipal council tem tsüngda tesentaktep tajung alitsüla aser kiojen asüdang power lines timi enoktsüla, ta Chief Secretary-isa metetdaktsü.
Department of New & Renewable Energy-ia solar aser mini hydro project tem ajanga power generation atema mapa inyaker anungji Power department-i NRE den tenangzüktep agitsüla, ta Kumar-isa ashi.
State sorkaria power department indang khurettem atema bilemtsür aser iba dak sendakba nung kobi melii State Power Policy ka yanglutsü. Department inyaksangshi tajungba kümdaktsütsü atema APEN aser sorkari külemi inyaktsüla, ta paisa ayongzük.
Sentong nung APEN tir, Er Keviletuo Yiese-i o jembidang ashiba agi, küm süia arudang power sector nung temelenshi aser terenlok lir anungji tematiba jenjang nung mapa inyaktsü nüngdaker.
“Asenoki asen mapa tali nendaka aser bendanga agüja inyaktsü tenangzükba agidi. Asenoki sorkar nungi tangutsü aliba meshiba den kasa mapang nung asen teinyaktsü wadang mamatsüla aser nübortem tajungba nung tenzüktsü merangdi” ta Er Keviletuo Yiese-isa züngsemtem ayongzük.
Tanü agiba sentong nung mendenji APEN general secretary Er Penrithung Yanthan liasü, Chief Engineer (Transmission & Generation) HoD, Er K. Miachieo aser Chief Engineer (Distribution and Revenue) Er G. Chishi nati o tatsütsü jembi aser Er Moa Aier-i anküp tepela o jembi.