Child Care Institutions tanurtem Raj Bhavan

Dimapur, Mongputeni (October) 6 (TYO): October 6, 2018 nü Raj Bhavan Kohima nung Child Care Institutions pur outreach programme nung tanur 141-i shilem agi.
Anogo tanabuba sentong agidang Dimapur district kübok Child Care Institutions 23 nungi tanur 141 aser care takers 26-i shilem agi.
Sentong nung Commission for Protection of Child Rights Chairperson, Awan Konyak-i tanurtem ayongzüka jembidang, Child Care Home nung parnok den külemi alirtem meimtsü aser akhümtsübutsü atema ayongzük.
Laisa kaketshirtem dang shisaliok süoki ia bilemtsü aser jenjang temaba atongtsü atema temulung agüja azüngtsü ayongzük.
Nagaland Governor-i Nagaland state ajungalen aliba Child Care Institutes tanurtem atema sentong tajungba ayongba atema kangasa pelar, ta Awan Konyak-isa ashi.
Wondang – Ki Children Home nung alirtem tenüng nung Grace-i o jembidang “Governor-i tanurtem atema aria bilemtsüba aser temeim sayuba atema pelar” ta ashi.
Laisa külem medemsortem dang alizüng atongtsü atema kanga meranga inyaktsü tayongzükba agütsü.
Sentong nung Chanan House of Hope, Ebenezer Orphanage Home, Deaf Biblical Ministry, Naga Blind Children Home aser Atsi Tatu nungertemi shilem balala agi.
Nagaland Governor PB Acharya-i tanurtem den sensaksemdang shisaliok aser meranga inyakba ajanga parnok alizüng atongtsü atema tayongzükba agütsü.
Governor-isa tanurtem lidaktsütsü atema reju lapokertem dang pelaba metetdaktsü aser maneni tanurtem atema inyaktsü imlar ta ashi.
Sentong nung mendenji Banuo Koza liasü aser lai tesentepertem pela agizükdang Governor Acharya-i sorkar indang welfare schemes aser programmes inyaktsü atema kanga jangar, ta ashi.
Teküpoktiba jenjang nung alirtem aser nüngdakbapurtem ajangzüktsü atema pai welfare schemes aser programmes inyaker. Talisa Governor aser pa kinungtsüi Nagaland nung Child Care Institution tanurtem asoshi Raj Bhavan kishi lapoktsüba atema tenüngsang agütsür, ta Banuo Koza-isa shisem.
Sentong agiba sülen Raj Bhavan kima nung saisaping kar asaya. Governor-i Child Care Institutions nem carom board, board games, skipping ropes lema agütsü. Paisa Naga Blind Children Home, Dimapur nem guitar ka agütsü.