‘Child Labour’ anema ozüng takang ka nüngdaker: Satyarthi

New Delhi, October 07 (Agencies): 2014 küm Nobel Peace Prize takok angur, Kailash Satyarthi-i tawa United Nations nung ‘Sustainable Development Goals (SDGs) Summit’ nung jembiba sülen Bodhbar nü New Delhi nung pai, linük nung tanurtem mapa inyakdaktsüba anema ozüng takang ka alitsüla, ta takhangba agütsüogo.
Temzüng alema tanürtem mapa inyakdaktsüba anema pai alima ajungalen sentong ka tenzüktsü osang sangdongogo.
New Delhi nung Constitution Club of India sentong ka nung jembidang pai, iba onük atema pai Ato kilonser Narendra Modi den-a jembiogo ta ashi. “Onoki akhangbatem sorkari agizükogo,” ta pai ashi.
Tanurtem anema inyakba alima nem meteta kümdaktsütsü asoshi pai sentong ka lemsatepa liasü. “Iba programme kübok onoki alima ajaklen tanurtem aser lanurtem ajungmesoa tanurtem anema inyakba mapatem anentsü asoshi inyaktsü,” ta pai ashi.
“Tanurtem mapa inyakdaktsüba anema parnok asoshi lanur million aikati ola adoktsü. Tanur dak azükba, shisaliok junga magütsüba aser tanurtem anema alibaren atema meinyakba densema tanurtem anema inyakba balala indang onoki lanurtem nem metetdaktsütsü,” ta pai ashi.
“Alima ajaklen tanur million 100 shi anema tapu balala inyakbaji tebilemtsü tuluka lir,” ta tanurtem atema inyaker Satyarthi-isa ashi.
Paisa tamangba yimsü balala lenirtem dang tanurtem indang temetentem atema inyaktsüla aser iba indangji alima nem metetdaktsütsüla, ta ayongzükogo.