CHILDLINE Dmr-i ‘Child Rights’ onük nung awareness agütsü

Dimapur, Aami/June 06 (TYO): Tanü CHILDLINE Dimapur den tawa tentetba, Mokokchung aser Karbi Anglong CHILDLINE teams ayongteper Shepherds’ School, Padumpukhri, Dimapur nung “Child Rights and Protection of Children from Sexual Abuse” onük nung awareness sentong ka katsüogo, aser iba sentong nung shisalen sayurtemji CHILDLINE Dimapur nungi Centre Coordinator, Lozua Kape aser Councellor, Totivili K na liasü.
Lozua Kape-i linük temzüng kübok tanurtem nem temeden balala agüja aliba indang, talisa UNCRC kübok tanur shia nem temeden pezü- Right to Survival; Right to Development; Right to Participation aser Right to Protection temeden agüja aliba indang metetdaktsü.
Laisa 2012 Protection of Children against Sexual Offence Act (POCSO Act 2012) onük nunga jembia liasü.
Totivili K-i kaketshirtem aser staff tem dang CHILDLINE-i inyakba maparen balala metetdaktsüba den külemi timtem ajurur tanurtem mesüra taini toll free 24×7 CHILDLINE No. 1098 ajanga teyari meshitsü metetdaktsü.