Childline India Foundation senden amen

Dimapur, Tsüklai/February 18 (TYO): Ministry of Women and Child Development, Government of India kübok Childline India Foundation-i ayonga Administration department, NGO tem, lokti aser Arogo lenirtem aser lokti tentet balala den Zunheboto, Deputy Commissioner conference hall nung February 17 nü senden ka menogo. District nung child helpline service ka amenoka, tanurtem tekümzükba kübok toktsütsü aser lokti nung tanur temeden indang tangazükba agütsütsü nükjidong nung iba senden amen.
Iba senden ya Deputy Commissioner, Peter Lichamo lenisüba kübok agi aser pai, iba mapa tajung asoshi Ministry aser shisalen agütsür Abhishek Biswas dang pelaba lemsatep. Paisa, senden nung mulungsoa adener ajak dang pelaba lemsatepba den tanurtem ajangzüktsü mechi iba inyakyim shidak benoka benshitsü atongzük.
Childline India Foundation, koba 1996 küm Ministry of Social Justice kübok pilot project ka ama amenok aser 2006 küm Ministry of Women and Child Development, Government of India küboki aitdaktsü. Iba sabang ajanga linük ajunga nung tanurtem nem ghonda 24 teyari agütsür. Iba lokti tentet yagi train station 118 ayimjema inyaker aser tarutsü nung linük nung bus station balala ayimjema inyaktsü sentong lir.
Senden nungsa shisalen agütsüri, Advisory Board amala District Child Protection Unit ka amenoktsü nüngdakba lemsatep, koba DC lenisüba kübok inyaksangshitsü aser maparen balala atema NGO tem den longjemer inyaktsü.
Maneni shisalsen agütsür den sentepa aliba lokti sensaksem mapa tajung ka agiba sülen senden tembang.