CHILDLINE Se Dosti Week sentong tenzükogo

Dimapur, November 10 (TYO): Hopta ka peyong amungtsüba sentong, CHILDLINE Se Dosti Week, linük ajunga nung tenzüka mungdar. Iba sentong ya CHILDLINE India Foundation puri ayongzüka linük ajunga nung medemer kümshitsüba aser Child Rights aser Child Protection Acts dak sendakba nung temetettsütem aser kümdangshia alitsüba atema tangazükba balala agütsütsü nükjidong nung tenzük. CHILDLINE Dimapur puria iba sentong November 8 2017 nü nungi tenzüka munga arudar.
CHILDLINE Dimapur team puri partner ka ama aser friendship week nung shilem ka ama iba sentong tenzüka Dimapur nung Traffic Police assistance kiosks tongtibangtem nung CHILDLINE pamphlets madaktsü. Iba anogo ana poster campaign ya Dimapur Police Commissioner-i kanga meranga nungita yariba ajanga lir, shibai Kiosks tem angati amshitsüba atema temelaba agütsü. Iba sentong ya November 15 nü sentong balala agia tembangtsü.
CHILDLINE puri tanurtem aser nüburtem ajak dang toll free CHILDLINE helpline no. 1098 kanga shisa kaa amshitsü asoshi mepishi, koba hopta peyong ghonda 24 lapoka dang alir. Nüburtemi tanurtem reshikangshiba, sentokba, samaba mesera timtem nung aliba ngura parnok nem metetdaktsütsü asoshi mepishi.