Chile nung magnitude 8.3 menoknok anok; nisung 5 asü

Chile anüdoklentip tsütsü tzüyimkümlen magnitude 8.3 tesashi menoknok ka yasüng, Bodbar aonung anokba sülen Chile kübok Valparaiso yimti nung police ketdangsertemi gari nung mener yimti yimdong sema jajaba noksa nung angur. (Valparaiso, September 17)

 Santiago, September 17 (Agencies): Chile linük nung magnitude 8.3 tesashi menoknok yasüng, Bodbar aonung anokba sülen nisung 5 tashi asüba aser nisung million ka dak tema pei talidak nungi aniteta tanga tesemtem nung jenokdaktsüba osang jangjaogo.

Yashi Chile nung menoknok anokba ajanga par linük nungi kilometer 1500 shi pilar Argentina kübok Buenos Aires yimti nunga nisung aliba ki kanga sashia anokzükdaktsüba osanga jangjaogo.

“Tan anokba menoknokji Chile linük otsü nung menoknok tesashi 6 buba anoker lir aser taküm 2015 küm tenzüker tanü tashi nung alima tesem balala nung anokba menoknok rong nung tesashitiba,” ta Chile’er Deputy Interior Minister, Mahmoud Aleuy-i metetdaktsü.

Menoknok anokba ajanga tsunami lendonga ataloktsü akok ta tsüboa, Chile linük tzüyimkümlen densemba tesemtem nung alirtemi kümdangshia alitsü tekümdangtsü osanga sorkari metetdakja liasü.

Tan menonok anokba sülen Chile north-central tzüyimkümlen alir kibong 135,000 dak temai light tesangwa monguteti kang timatemba osang jangjaogo ta National Emergency Office-ia metetdaktsü.

Tan menoknok tenzükdak anasa tentetba Central Choapa province nung lendong kanga sashia atalokba sülen iba tesem nung mitkar ozüng benoka lir.

“Tan menoknok tiyongtsüji Santiago yimti nungi anüdoklentip tsütsüleni kilometer 228 shi pilar aliba osang bushitetogo,” ta United States Geological Survey-ia osang jangjashitsü.

“Tan menoknok anokba sülen tsunami lendonga ataloktsü akok ta bilema tzüyimkümlen tentetba jila aser yimtitem nung alirtem tesem tangai anir oa jenokdakja lir,” ta Chile Interior Minister, Jorge Burgos-ia metetdaktsü.

Tan lendong nung asür rong nung Illapel yimti nung tetsür ka aser Santiago yimti nung arishi küm 86 tain tebur ka densemba osanga jangjaogo.

Ano külen, tan lendong atalokdak tsüngdong tonga oa semdangtsü sentong renemba osang ka Chile Tir, Michelle Bachelet-ia metetdaktsüogo.