Chile telok Copa America asayamong final-i iogo

Chicago, June 23 (Agencies): Chile teloki goal 2-0 agi Colombia telok madak tanabuba semifinal asaya koka tang tasayadak Copa America Centenario football asayamong final asayatsü jenjang yashi, Bodbar nü nguogo.
Yashi tzünglu kanga sashia aruba yong par semifinal asaya ghonda 4 shi nung ang tembanga liasü.
Defending champions, Chile teloki yaküm final asayaba telok, Argentina den tan Deobar nü final asayatsü.
Quarterfinal asaya nung Mexico telok madak goal 7-0 agi takok angur, Chile teloki yashi asaya tenzüker mezüngbuba minute 11 tsüngda nung takokba goal 2-ji agütsü.
Bayer Leverkusen midfielder, Charles Aranguiz-i minute 7 buba nung goal 1 agüja par Chile telok temaba jenjang nung ajungkettsüba sülen külem asayar, Jose Pedro Fuenzalida-i minute 11 buba nung tanabuba aser takokba goal agüja par Chile nem takok ngudaktsü.
Real Madrid asayar, James Rodriguez densema, par Colombia teloki kanga meranga asaya saka par teloki goal ka danga meyiptsüteti yashi tamakok ajuru.
Yashi asaya nung El Salvador nunger referee, Chicas Aguilar-i yellow card 8 aser red card temerenshi ka agüja liasü.
Tan Deobar nü final asayabaji Chile aser Argentina teloki tan asayamong nung tanabenbuba ajuruteper alitsü.
Tan June ita tetenzüklen asayaba Group D tetenzükba asaya nung Argentina teloki goal 2-1 agi Chile madak takok ngua liasü.