Rescue ketdangsertemi ali telung nung anogo 36 tashi anenbanga alir nisung 4 tashi kümzüka anitetba noksa nung angur. (Shanghai, January 30)
Shanghai, January 30 (Agencies): Ali telung nungi gypsum tuteter nisung 4 tashi ali telung nung anogo 36 tashi anenbanga lir külen China’er rescue ketdangsertemi yasüng, Hokolbar aonung kümzüka anitetba osang jangjaogo.
Rescue ketdangsertemi ghonda 2 shi agia mapa inyakba sülen ali telungleni feet 660 shi irr ali agi abenbanga alir nisung 4-ji kümzüka aniteta liasü.
Tan nisung 4-ji China anüdoklen tsütsülen Shangdong province nung tentetba Gypsum tutetdak nungi kümzüka anitetba osanga jangjaogo.
“Tan ali telung nungi kümzüka anitetba nisung 4-ji arishi küm 50 tain Zhao Zhicheng, arishi küm 39 tain Li Qiusheng, arishi küm 58 tain Guan Qingji aser arishi küm 36 tain Hua Mingxi nunger aliba osang jangjaogo aser parnoki kobi meli pei kidangi shilangtettsü,” ta tan kümzüka anitetba nisungtem anepaluba mozüki nung Deputy Head, Cao Qingde-i metetdaktsü.
Tan kümzüka aniteter nisung 4-ji yaküm 2015 küm December ita 25 nü ali agi anenbanger nisung 29 rong nung densemba osang jangjaogo.
Parnok 29 rong nungi nisung 11 tashi tasüng, December ita 26 nü kümzüka anitetba aser nisung 1 asüba osang jangjaogo saka tanüngba nisung 13 tanü tashi monguteti lir.
Rescue ketdangsertemi tanü kümzüka aniteter nisung 4 ali telung nung taküm alibaji yaküm December ita 30 nü bushitet aser parnok achiajemtsü, tabentsü sü aser milen nunger ali telungi yoka liasü.
Ajiüaka, rescue ketdangsertemi ali telungi meitettsüsa küma nisung 4-ji anogo aika ali telung nung lidaktsütsüa akümba sülen lung tupoka iya tan par 4-ji kümzüka aniteter lir.
“Tan mezüngsüa lung tupoka ia nisung 4 tashi ali telung nungi kümzüka anitetba ajanga People’s Republic of China linüki otsü tasen ka yangluogo,” ta China’er State Administration of World Safety ketdangser, Gao Guangwei-ia metetdaktsü.
Tan lendong atalokdak kiburi lendong atalokba osang angazükba sülen pasasa soseta asüba osanga bushitetogo ta China sorkari ketdang asüba Xinhua osangia metetdaktsüogo.
You must be logged in to post a comment Login