China: Alibaba teloki internet mesenlokba gari sayaogo

Hangzhou, July 06 (Agencies): China nung tentetba tongti technology telok, Alibaba-i internet mesenlokba gari China anüdoklen, Zhejiang province kübok Hangzhou yimti nung tanü, Bodbar nü sayaogo.
“Ozü teloki internet mesenlokba gari tan sayaba sülen tarutsü anogotem nung tanishir memeni pasasa yimti yimdong nung senzütetba gari alima dang sayatsü renema lir,” ta Alibaba nung Chief Technology Officer, Wang Jian-i metetdaktsü.
Alibaba teloki China nung tentetba gari yanglur telok tulutiba, SAIC Motor Corp nati aroki lungjemer smartphone den sentakteptetba YunOS operating system mesenlokba gari tanü saya aser internet mesenlokba gariji taküm, 2016 küm tatemlen nungi tenzüka nüburtem dang ayoktsü sentong lir.
Alibaba telok jakdang, Alphabet tenteti ketdang asüba Google telok, Apple aser Baidu teloktemia smartphone den sentakteptetba gari taoba mapang sayaogo.
Ajisüaka, tanü tashi nung telok aser tentet kati danga shishilembabaren nung amshitettsüsa tanishir memeni pasasa senzütetba gari takok ngua meyangluteti lir.
Mongintemi ashiba agi, tanishir memeni pasasa senzütetba gari tarutsü mapang, 2020 aser iba sülen ang takok ngua yanglutettsü.