China anentsü lendong nung nisung 91 samar bushir

China anülulentip tsütsü Guangdong province kübok Shenzhen industrial park nung anentsü lendong tesashi ka atalokba sülen rescue ketdangsertemi lendong atalokdak mapa inyakba noksa nung angur. (Shenzhen, December 21)

 Beijing, December 21 (Agencies): China anülulentip tsütsü, Shenzhen yimti nung anentsü lendong tesashi ka yashi Deobar nü atalokba osang ka sorkar ketdangsertemi metetdaktsüogo.

Yashi Shenzhen yimti kübok industrial park nung atalokba anentsüi nisung aliba ki 33 tashi anenbangba sülen nisung 91 tashi samar tang bushiba osang jangjaogo ta China sorkari ketdang asüba Xinhua osangi metetdaktsü.

“Hong Kong arrtsülen, Guangdong province tiyongtsülen tentetba Shenzhen yimti nung anentsü lendong atalokba sülen tebur 59 aser tetsür 32 densema, ajak agi nisung 91 tashi tang samar bushidar,” ta osangi ashi.

Osangisa ashiba agi, tan anentsü lendong ya alimang square feet 650,000 shi nung ataloka kasa tesemji lishi feet 20 talang agi anenbanga lir.

“Tan anentsü lendong atalokba sülen nisung 900 dak tema tanga tesemi anir oa jenokdakja lir aser tang samar alir nisung 91 bushitsü maparen nung rescue ketdangser 1,500 shi kanga meranga inyakdar,” ta Shenzhen yimti sorkar nung deputy secretary general, Li Yikang-i osang jangjashitsü.