China anülulentip tsütsü 22 tsükset, 13 shi yiru

China anülulentip tsütsü Hunan Province nung gari tsüktepba lendong tesashi ka tanü Hokolbar nü atalokba sülen rescue ketdangsertemi lendong atalokdak mapa inyakba noksa ka yangi angur. (Hunan Province, September 25)

Beijing, September 25 (Agencies): China anülulentip tsütsü Hunan province nung gari tsüktepba lendong tesashi ka tanü Hokolbar nü atalokba osang ka sorkar ketdangsertemi metetdaktsüogo.
Hunan province nung truck gari 2, coach bus gari 1 aser van gari 1 densemba tsüktepba lendong nung ishiba agi nisung 22 tsüksetba aser parnok 13 shi yiruba osang tang tashi nung jangjaogo ta parnoki ashi.
“Khu abenba truck gari anishir kati pai aniba gari mazüokteti akümba sülen kasa lenmang nung jajaba truck gari tilaba ka atsür tejaklen nungi aruba garitem jajaba lenmangi aoba sülen tejaklen nungi aruba coach bus gari 1 aser van gari 1 den tsüktep aser gari nung mi temloka arung,” ta Hunan province sorkari tanü osang jangjashitsü.
Ajisüaka, kechi timtem ajanga truck gari anishisangi pai aniba gariji mazüoktettsüsa aküm iba osang tang tashi mejangjateti lir ta China sorkari ketdang asüba Xinhua News Agency-ia metetdaktsü.
“Tan lendong atalokba den sentakba bushisüngdang maparena tenzükogo,” ta osangi shisem.
China-i kümshi ayonga amongba Moon Festival aser National Day benjungmong amongtsü terenemshiba agitsü tenzükba ita, September nung gari teti jajaba den timba küma highway balala nung tanü amala lendong atalokba osang bushiteta lir.