China aser Serbia nati tezüngzüktep 22 tashi zülutepa agi

Belgrade, June 18 (Agencies): China-i Serbia linük den tezüngzüktep 22 tashi zülutepa agia, par China’er rongsenren jenjang Europe anüdoklen aser tiyongtsülen nung temaba jenjang nung ajungkettsütsü tongti mera ka tanü, Honibar nü agiogo.
Serbia semdangsang, China Tir, Xi Jinping-i Serbia Tir, Tomislav Nikolic den rongsenren aser ki o jen den sentakba tezüngzüktepji Serbia kübok Belgrade nung tentetba chuba kidang tanü agia liasü.
Xi-i tan Serbia semdangba ajanga par linük tentetba shishilembatsü telok aser tentettemi Europe nung tentetba shishilematsü telok aser tentettem den shishilembatsü lenmang sadema lapoktsütsü teimla lir.
“Balkan tesem nung tentetba Serbia linüki China’er rongsenren jenjang tajungba kümdaktsütsü mapatong nung tongti shilem agir aser iba atema par linük dang pelaba metetdaktsür,” ta Xi-i tanü  metetdaktsü.
Ano, Serbia linükia China den tesendaktep tajung yanglua par linük ana tsüngda rongsenren aser ki o jen amaliteptsü tajung alitsü jangraba olen ka Nikolic-ia lemsatepa liasü.
Serbia nung gari senzütsü lenmang yanglutsü aser energy tashi den sentakba mapatong balala takok ngua inyaktsü asoshi China-i taoba mapanga dollar sen billion 1 shi Serbia sorkar nem aputsüba osang bushiteta lir.
Ano, Serbia European Union (EU) nung züngsemtsü mapatong nunga China-i Serbia linük pusema nungitsü renemba tenangzükba olen ka Xi-i metetdakja liasü.
Xi-i tan Serbia semdangba sülen pai maneni Poland semdanga par linük dena rongsenren tezüngzüktep ishika agitsü sentong lir.
Ano, China aser Russia nati aroki lungjemer ayongba regional senden, Shanghai Cooperation Organisation nung shilem agitsü asoshi Xi-i Uzbekistan linüka semdangtsü renemogo.