China atema lokti tentet aser osangbener kanga tongtipang: Ban

Beijing, July 07 (Agencies): Lokti tentet yangerba aser tetsükdakba kecha meli osang prokshiba ajanga China nung terenlok alitsü olen ka United Nations (UN) Secretary General, Ban Ki-moon-i tanü, Brehostibar nü metetdaktsüogo.
Ban-i UN lenisang menden toktsüba jakdang tan tatemsüa China semdangdang iba olenji tanü metetdaktsü.
“China-i temelenshitsü agitsü tenzükdang China lenirtemi lokti tentet balala nem tongti shilem agidaktsütsü ajungshir,” ta China Foreign Minister, Wan Yi den aroki Beijing nung osangbener den ajurutepdang Ban-i ashi.
Wang-i taoba June ita Canada semdangdang China-i meimchir temeten anema inyakba indang asüngdanger osangbener ka atalaja liasü.
Ban-isa ashiba agi, lipoküm wazüka ayutsü asoshi nokdakertem, meimchir temeten atema nokdakba okatsür aser parnok amala lokti tentet balala nungi lenirtem nem tongti shilem agidaktsüba ajanga China nung terenlok alitsü aser par rongsenren jenjanga tajungba akümtsü.
Ano, tetsükdakba kecha meli osang prokshitsü temeten osangbenertem nem agütsüba ajanga sorkar aser ozüng yanglur inyakyim tajungba akümtsü aser alimaia China linük temaba jenjang nung ajungketa benshitsü ta pai ashi.
China nung tentetba Communist Party (CP) yimtenren teloki taoba mapang nungi China den sentakba osangtsüsang prokshitsüren azüoka aruba sülen CP lenisang, China Tir, Xi Jinping-i taküm February ita nungi tenzüka osangbenertemi CP telok pusemtsü tetuyuba agüja liasü.
Tan hopta ya China sorkari meimchir temeten asoshi nokdaker okatsür aser lokti tentet lenirtem anema tashiyim inyakba aser parnok nisung 200 tashi pua yua merenshir küm 1 abensaba hopta lir.
Iba tatalokbaji ataloker küm 1 süiba sülena China-i nisung 20 dak tema mechioki aliba aser parnok rong nung nisung aika China sorkar anemba ken o nung aitsüba sülen taküm tepiyong tepuokdak puoka ayutsü temerenshi agüja aliba osang bushiteta lir.
Ban-i Wang den senden amenba sülen maneni Xi den tanü ajurutepba osang angazükogo aser pai China Ato Kilonser, Li Keqiang dena asüng, Hokolbar nü ajuruteptsü sentong lir.