China-Bangladesh tesendaktep tali akhangshir

United Nations, September 27 (Agencies): United Nations (UN) nung China aser Bangladesh tsüngda inyakyim balala nung tensendaktep tali renloktsü asoshi tezüngzüktep agiogo.
Bangladesh ji kidanger, medemer aser külem ser inyaktsü asoshi linük tajung ta ashiba mapang, China Tir, Xi Jinping-i, “Beijing-i South Asia-Indian Ocean region nung Bangaladesh ji partner tajung ka ta züngshir aser Dhaka den tesendaktep ayuba ajanga tongtibang onüktem lemsateptsü,” ta ashi.
Honibar nü Tir, Xi Jinping-i Bangaladesh Ato Kilonser, Sheikh Hasina ajuruba mapang linük ana tsüngda amalitepa lungjemer shishilembaba, kechisarena yangluba, energy terenlok aser infrastructure tsütsü tali renloktsü atema mulungtepogo, ta Xinhua news agency ajanga metetdaktsü.
Xi-i, “Linük ana tsüngda International aser linük sasep nung tebilemtsü tem asoshi teti tongtepratepa aser amalitepa inyaktsü,” ta ashiba mapang, China-i tzü-mopung melenshiba tsütsü Bangaladesh nem teyari agütsütsü, ta shisem.
Bangaladesh-i rongsenkettsüng tsütsü terenlok asoshi Bangladesh, China, India aser Myanmar linüktem tsüngda tesendaktep ayutsü merangba maparen China-ia temulung süa repranger aser iba inyakyim nung akok tashi nungita yaritsü tebilemba lir.
Hasina-i, küm 40 tejaklen Dhaka nung Bangladesh aser China na tangatettep tajung ka ayuba sülen tang tashi telungjem kanga tashi ita lir aser ibaji asoshi China dang pelar, ta ashi.