Kathmandu, March 23 (Agencies) : China Defence Minister General Chang Wanquan official nüngdak asoshi anogo asemnü amungtsü atema tanü Brihostibarnü Kathmandu tonga aruogo.
Yaküm küm August ita nung Pushpa Kamal Dahal linük Ato Kilonser akümba sülen Nepal linük kangasa tongtibang nüngdak asoshi semdangbaji tan ya mezüng lir.
Taruba ita China aser Nepal na lokteper military drill agitsü sentong lir. Iba sentong asoshi anogo tejangjaji Chang China-i meyipa maodangsa metetdaktsütsü, ta ketdangsertemi ashi.
Nepal Defence Minister Bal Krishna Khand-i jaokba ama Sri Lanka semdangba sülen Chang-i pa den nisung 19 anir Nepal-i aru.
Khand den Nepal Defence Ministry nung ketdangsertem aser Army temi Chang aruba agizük.
General Chang-i linük Tir Bidya Devi Bhandari aser Nepal Army Chief General Rajendra Chhetri na den Hokolbarnü ajuruteptsü sentong yangluogo.
Iba den külemi pai Kathmandu kübok Basantapur Durbar tesem nung menoknok agi raksatsüba tesemtema reprangdangtsü sentong lir.
China Defence Minister General Chang Nepal tongogo added by nungsang on
View all posts by nungsang →
You must be logged in to post a comment Login