China den raratsü atema India renema alitsüla: Ramdev

Mumbai, August 13 (Agencies): India aser China na tesendaktep mejungi aliba mapang ka nung Deobarnü Yoga tesayur, Baba Ramdev-i, China linük den raratsü atema India renema alitsüla, ta jembi.
Deobarnü Mumbai nung World Peace & Harmony Conclave nung jembidang Ramdev-i, “China-i yimjung atema inyakra, tang Dalai Lama ya yangi (India nung) melila,” ta ashi.
Ramdev-isa, India-i yimjung ajanga ken o latettsü atema asüngdangba shia China-i rara agi amokmerener, anungji India-ia kasaji inyaktsüla, ta ashi.
“Parnoki yimjung tetezü magatetra asenoki parnok nem rara agi telangzüba agütsütsüla,” ta paisa ashi.
China-i alima nung rara ajungkettsür aser tesempa proker, ta ashiba den külemi India nunger dang China nungeri yangluba/adokba osetttem malitsüla, ta ayongzük.
“Linük atema bilemtsür India nunger shia tang nungi China nunger osettem mamshitsüla,” ta pai metetdaktsü.
Ramdev-isa, linük nung China nungeri yangluba osettem nokdangtsüla, ibaji ajanga India nung parnok indang market ajema akumtsü, ta ashi.
“India nungeri China nungeri yangluba osettem nokdangtsüla. Ibaji ajanga asen linük nung parnok market kanga ajema akumtsü. China nungeri yangluba electronic osettem, automobiles, tanur kazütsü osettem densema oset aika agi India nunger market atsüngogo,” ta Ramdev-i ashi.
Arrtsülen Doklam nung tang India aser China nunger sepaitem tejak chitepa lir aser linük anapronglai iba tesem jagi sepai tali, injang aser raraba osettem aika yokogo.