China den rongsenren tesendaktep junga ayutsü ayongzüker: EU

Brussels, May 09 (Agencies): China linük den rongsenren tesendaktep junga ayutsü tayongzükba olen ka European Union (EU)-i tanü, Hombar nü metetdaktsüogo.
“China den shishilembatsü aser rongsenren tesendaktep tajungba küma yanglushitsü ayongzüker,” ta EU’er China ambassador, Hans Dietmar Schweisgut-i sangoktsü.
Paisa ashiba agi, taoba mapangbo Europe nung tentetba shishilembartemi China den shishilembatsüren tazüokba nung inyaktsü mulunga liasü saka tanübo inyakyimji melenshia, China den sako jenjang nung shishilembatsü tangatetba ayutsü tenzükogo.
“China nung tentetba shishilembatsü teloktemi Europe nung tentetba bank-tem alizükteter saka Europe nung tentetba bank-temibo China’er bank-tem alizüktsü makoker,” ta shia, EU o China na tsüngda rongsenren tesendaktep tajungba akümtsü mapang atongba olen ka Schweisgut-i metetdakja liasü.
Ano külen, China southeast tsütsülen, Fujian province nung atalokba anentsü lendong nung ali agi anenbanger tasümang 22 tashi tutetba osang ka China sorkari ketdang asüba Xihua news agency-i tanü metetdaktsüogo.
Tzünglu kanga sashia aruba ajanga Tainin county kübok Sanming nung teyangludak hydroelectric power station ali agi yashi, Deobar nü anenbangba osang jangaogo.
“Yashi atalokba anentsü lendong nung anenbanger tasümang 22 tashi ali telung nungi tutetogo aser samar bushia aliba nisung 2 tashi nguogo. Ano, nisung 17 tashi samar monguteti lir,” ta Xinhua osangi metetaktsü.
China Tir, Xi Jinping-ia lendong nung densemertem kümzüka anitettsü maparen taküm bendanga agüja inyaktsü asoshi rescue ketdangsertem dang tuyuogo saka tangasa tzünglu tanen makai aruba ajanga nisung kümzüka anitettsü maparen nem tetsükdakba agütsüba osang jangjaogo.
Yaküm, 2015 küm December ita nunga Guangdong province kübok Shenzhen nung tentetba industrial park ali agi anenba ajanga nisung 70 dak tema asüba osang bushiteta lir.