China den tanaben melokteptsü: Ma Ying-jeou

Taipei, October 01 (Agencies): Taiwan linüki China den tanaben lokteptsü sentong maliba olen ka Taiwan Tir, Ma Ying-jeou-i tanü Brehostibar nü metetdaktsüogo.

Par linük ana tsüngda rongsenren aser shishilembaren tesendaktep tajungba akümtsü tenzük aka, par democracy yimsüsütsü yimya benshiba Taiwan-i Communist yimya benshiba China den tanaben lokteptsü sentongbo renema mali ta arishi küm 65 tain Ma Ying-jeou-i tanü ashi.

“Ozü linük ana tsüngda yimtenren tensa ken yongi balala lir anungji, Taiwan China den tanaben lokteptsüji tamashi maparen ka asütsütsü,” ta pai shisem.

Taiwan madak toaba küm 8 tashi yimsü süa arur külen sangküm 2016 küm Tir menden nungi anentsü alisang, Ma lenisüba kübok par Taiwan o China na tsüngda shishilembatsü aser rongsenren tesendaktep toaba mapang nungi kanga agi tajungba akümba osang bushiteta lir.

Communist yimsüsürtem anema tamakok ngua nokdakdangba sülen Nationalist züngsemtemi China 1949 küm toktsü aser Taiwan linük tenteta parnoki democracy yimsüsüba yimya benoka kasaji tanü tashi benshir.

Ajisüaka, nütsüng yongsük million 23 shi densemba asetkong linük, Taiwan par yimsüsüba kübok aiter ta Beijing-i tanü tashi züngshir.