China foreign minister-i Swaraj ajura senden amen

New Delhi, August 13 (Agencies): Tanü China Foreign Minister, Wang Yi-o Ato kilonser, Narendra Modi ajuru aser India Foreign Minister, Sushma Swaraj den senden amendang India-i NSG züngsem akümtsü atema benokba densema linük ana tesentaktep onüktem nung o lemtepogo, ta osang angazüker.
Taküm June ita nung linük 48 plenary senden alidang India-i Nuclear Suppliers Group (NSG) züngsem akümtsü atema benokba China-i nokdanga liasü.
India-i Nuclear Non-Proliferation Treaty (NPT) tezüngzüktep magiba nung ajemdaker China-i India NSG züngsem akümtsü benokba  nokdang.
Wang aser Swaraj natisa taküm October ita India, Goa nung ayonga aliba BRICS senden onüktema jembi. Ajisüaka China-i South China Sea onükbo mesüok, ta osang ka ajanga ashi.
Senden nung Swaraj-i Wang dang, China-Pakistan Economic Corridor agi India litsü adenba tebilemtsü indang lemsatep.
Swaraj-isa China dang UNSC 1267 Committee nung Jaish chief Masood Azhar nokdangba tanaben reprangshitsü mepishi.
Tesülen External Affairs Ministry otongdar, Vikas Swarup-i twitter ajanga, “Linük ana tongtibang onüktem nung o lemteper. EAM @Swaraj-i China EAM Wang Yi New Delhi nung ajuru,” ta ashi.
Wang-i anogo asemnü India semdanga yashi pa Goa tonga aru, iba sülen pai Goa Chief Minister, Laxmikant Parsekar ajurua BRICS summit atema renemshiba osang metetpelaa liasü. Iba sülen pa yasüng New Delhi tonga aru aser tanep pai Modi mezüng ajuruba sülen  Swaraj den senden amen.