Beijing, February 22 (Agencies): China foreign minister, Wang Yi-i asüng, Mongolbar nü nungi tenzüka US semdangtsü sentong renemba osang ka China foreign ministry otongdar, Hua Chunying-i tanü, Hombar nü metetdaktsüogo.
Beijing aser Washington nati South China Sea (SCS) aser Korean Peninsula na den sentakba mangatettep ken o benshiba mapang ka nung Wang-i tan anogo 3 agia US semdangtsü sentong renemer lir.
SCS kübok Paracels nung densemba Woody Island nung par mitkartemi tongpang nung amshitsü osettsüset amenokba osang ka China-i taoba hopta metetdaktsüba sülen kidangsüa tentetba linüktem den külemi, US-ia tebilemtsü khuret benoka lir.
“China linük alena ayutsü nükjidong nung Terminal High Altitude Area Defence System (THAAD) mapatong benoktsü renemer,” ta shia, China-i iba mapatong anemba olen ka Chunying-isa metetdaktsüogo.
North Korea-i alima ashi mangai Kwangmyongsong-4 satellite anünglaki kaketa yokba sülen Pyongyang-i anünglaki satelitte kaket yoktsü dak atemer par tongpang nung amshitsü ballistic missile-tem tendanger ta alimai par linük dak temulung melemteti THAAD mapatongji inyaktsü renem.
“N Korea-i par nuclear osettsüset tendangba den külemi, anünglaki satellite kaketa yokba sülen United Nations Security Council (UNSC)-i Pyongyang anema tenokdangba sentong tasen benoktsü asoshi renemba maparen ozü China linükia agizüktsü mulunga lir,” ta Chunying-i metetdaktsü.
You must be logged in to post a comment Login