China Foreign Minister Wang Yi-i New Delhi semdangtsü

New Delhi, December 07 (Agencies): Taküm July ita nung Dokalam nung China aser India sepai na tsüngda rara adoktsüsa tensa ajuruba sülen tang mezüng China nunger tongti ketdangser, China Foreign Minister, Wang Yi-i December 10 nü New Delhi semdangtsü aser India tongti ketdangsertem den senden amentsü.
Wang New Delhi-i aruba ya RIC Foreign Ministers senden nung adentsü atema arur.
Dokalam nung anogo 73 tashi linük ana sepai tsüngda raratsüsa tensa ka adokba sülen August 28 nü anena liasü.
Russia, India aser China (RIC) Foreign Ministers senden dak alia jurila senden nung China ketdangseri India nunger tongti ketdangsertem ajurua senden amentsü, ta tanü China Foreign Ministry otongdar, Geng Shuang-i metetdaktsü.
15buba RIC senden ya December 11 nü New Delhi nung amentsü.
Geng-i, “Onoki angazükba agi, Wang-i India nunger tongti ketdangsertem ajurutsü aser iba dak sendakba osang tejangjaji tesülen metetdaktsütsü,” ta ashi.
RIC senden nungji linük asem nungi foreign minister temi International onüktem aser regional onüktem nung pei tangatetbatem lemsateptsü, aser linük asem taliba amalitepa inyaktsü atema bangjemtsü, ta paisa ashi.
Tamalen media osang ajanga ashiba agi, RIC senden ya taküm April ita nung amentsü sentong liasü, ajisüaka iba ita nungji Dalai Lama-i Arunachal Pradesh semdangba China-i ashishia senden anogo atema Wang-i metetdakdaktsüba ajanga sendenji thinen.