China handset yanglur Oppo-i India atema CEO ka shimogo

New Delhi, August 25 (Agencies): China nunger handset yanglur company Oppo-i, India nung parnok kongsang nung CEO asütsü asoshi Mike Wang shimogo, ta Mongolbar nü metetdaktsü.

Mike Wang ya Tom Lu melena shimerba lir.

Wang ya mobile handset industry nung küm metsü shi inyaka aruba nisung ka lir aser pa Oppo nung 2005 küm nungi külemi inyaker. Tesüiba mapang nung pa South-East Asia market tem aika nung lenir süa arua liasü.

Pa iba mapa asoshi shimba jembidang, Wang-i, “Oppo aser tanga mapa nung küm metsü tenzüka aruba mapang ni iba business inyakyim ajak kanga junga meteta aser jangja kümogo,” ta ashi.

“India nung mobile market ji kangasa renlokogo aser iba denji putepa onokia meranga inyaktsü. Onok mezüng küm India-i aitdang parnoki kanga junga agizüogo aser tarütsü mapang nung inyakyima aotsü bilemdangdang ni kanga jangratema bilemer,” ta pai ashi.

Oppo ya India market-i 2014 January ita nung ait aser kanga kara ainba India market den toktepa inyaktsü nükjidong lir. India nung Oppo meyong handset 400,000 shi yokogo aser takümbo handset million 1.5 ayoktsü tebilemba lir.

Tang tashi nung India tesem balala nung Oppo service centre ajak agi 120 lir aser 2015 küm atemdangbo service centre 200 lapoker alitsü nükjidong lir.