China-i 1000mv nuclear reactor tendanger

Beijing, October 27 (Agencies): China-i peisasa yangluba 1000 mv nuclear reactor tendangtsü maparen tenzükogo.

Ali telung nungi tutetba osettsüset amshibaren ajemtsütsü aser electricity tashi timba angutsü nükjidong tulu yur par linük iba tongti maparen ya tenzüka lir.

China-i par linük anüdoklen  Guangxi Zhuang Autonomous Region kübok Fangchenggang nung tentetba mezüngbuba nuclear power plant nung iba tendangtsü maparen ya tenzükba osang jangjaogo.

“Taoba mapang, 2010 küm nungi tenzüka iba reactor ya renemba sülen nungdakba light tashi angutsüsa iba reactor ya ghonda 168 tashi tendangtsü tenzükogo,” ta China National Radio (CNR)-i osang jangjashitsü.

China General Nuclear Power Group (CGN)-i Guangxi Investment Group Co Ltd. den külemi lungjemer pressurized-water reactor 2 tashi amenokba sülen reactor shiai light tashi megawatts 1,080 tashi agütsütsüsa tang renemteta lir ta CNR-i ashi.

China-i peisasa 1000 mv nuclear technology kanga junga yanglu tenzükba sülen Pakistan, Argentina aser Britain sorkari China’er nuclear reactor-tem alizüka amshitsü sentong renema lir.

“Fangchenggang nung tanü tashi nuclear reactor ana dang amenoka lir saka tarutsü mapang nung light tashi megawatts 1000 agütsütetba reactor 6 tashi amenoktsü sentong lir,” ta CGN-ia metetdaktsüogo.

Alizüng ayuba ama asangsang nung reactor 6 pronglaji amenokba sülenbo iba nuclear plant nungi ghonda nung light tashi kilowatts billion 15 tashi Guangxi kübok densemba Beibu Gulf Economic Development Zone nem agütsütettsü ta par teloki ashi.

Ano, ali telung nungi tutetba mijang amshiba nuclear plant den medemdangra, iba nuclear plant tasenbai mim aketba carbon dioxide tango ton million 11.86 agi tajemba adokdaktsütsü ta Global Times-ia metetdaktsü.

2020 küm tashi nung ali telung nungi tutetba osettsüset amshibaren ajemtsütsü nükjidong nung China-i tanü tashi nung nuclear plant 23 tashi renema lir aser nuclear plant 27 tashi tang teyangludak lir.

Ano, par linüki dollar sen billion 78.8 tashi amshia tarutsü mapang, 2030 küm tashi nung nuclear plant 110 tashi tentettsü alizüng yua lir.