China-i 2017 küm sensakertem asoshi ki million trok asütsü

Beijing, February 24 (Agencies) : China-i 2017 küm matemdangsa kanga tepetzük tia nung aliba nüburtem asoshi ki million 6 sütsütsü.
Iba osang ya Housing & Urban-Rural Development kilonser, Chen Zhenggao-i Brishortibarnü metetdaktsü, ta osangkaket ajanga sangdong.
China sorkari 2015 küm yimti tezülen aliba sensakertem asoshi küm asem project ka tenzük aser parnoki iba mapang nung ki tasen million 18 asütsü nükjidong liasü. 2015 küm ki million 6.1 yanglutsü aser ano 2016 küm ki million 6.06 yanglutsü tenzük.
Chen-i ashiba agi, Housing & Urban-Rural Development (MHURD) ministry-i January 16 nü nungi taküm küm atema sensakertem nem ki sütsüba mapa tenzük.
2017 küm mapa atema sorkari sen billion yuan 224.3 subsidy yimya nung agütsüogo aser ibaji yaküm tang nungi sen billion yuan 15 agi timba lir.
China 2020 tashi nungbo linük nung sensakertem aliba tesem ajunga yanglushitsü terenemshiba lir. Iba mapa takok ngua inyaktetttsü asoshi ministry-i nüngdakba department tem den akokba tashi tongtepratepa inyakdar.