China-i alima nung telescopes talangtiba India arrtsülen amendar

Beijing, January 07 (Agencies) : China-i India den ‘Line of Actual Control’ anasa Tibet nung alima nung talangtiba ‘gravitational wave telescopes’ amenokdar. Iba ya amenoktsü atema sen US dollar million 18.8 nüngdaktsü aser iba telescope yagi alima nungi adokba aongmedang tilatiba dena metettsü koba ajanga ‘Big Bang theory’ dang nungia osang tejangjaba agütsütettsü.
Ngari Prefecture kübok Shiquanhe jila anüolentip tsütsü nungi kilometre 30 shi pilar iba amenoktsü aliba telescope nem code tenüng Ngari No 1 ta agütsür maparen tenzüka inyakdar, ta Chinese China Academy of Sciences nung National Astronomical Observatories den bushisüngdanger rongnung tekolakba Yao Yongqiang-i ashi.
China aser India na arrtsülen Tibetan indang tesem tatembangbaji Nagri ya lir.
Iba telescope ya sea level dang nungi metre 5,250 agi talangba aser iba yagi Northern Hemisphere nung alemli nungi aliba gravitational wave tem puteta osang tejangja agütsütsü.
Telescope talangtiba ya 2021 küm renemtsü imlar, ta China sorkar indang osangkaket Xinhua news agency ajanga metetdaktsü.
Yao-i, tanabuba project nung telescope aika inoksemtsü aser iba code tenüngji Ngari No 2 ta ajatsü. Ibai sea level dang nungi metre 6,000 agi talangba asütsü, ta ashi.
Ngari No 2 ya kodang renemtsüar pai ano osang tejangja memetetdaktsü. Iba project ana ya atema budget nung sen yuan million 130 (USD 18.8 million) inoka lir.
Iba project ya Institute of High Energy Physics, National Astronomical Observatories, aser Shanghai Institute of Microsystem & Information Technology temi senteper inyakerba lir, ta kasa osang ajanga metetdaktsü.
Tzü level nungi talangka pilaa ajungketer aliba ajanga Nagri nungi cosmic light nung yimya masüba atalokbatem metettsü kanga junger.