China-i AP nung tesem trok par nüngja jaloktsü

Itanagar, April 19 (Agencies): India-i temelaba agüja Tibet nunger lenir, Dalai Lama-i Arunachal Pradesh semdangba atema China jashiba mapang ka nung China-i ‘South Tibet’ ta ajaba, Arunachal Pradesh nung tesem trok nem par nüngja jaloktsüogo.
April 14 nü Ministry of Civil Affairs-i parnok indang websites nung, tesem trok nemji China, Tibet aser Roman alphabet nung tenüng agütsüogo, ta sangdong.
Tenüng trokji- Wo’gyainling, Mila Ri, Qoidêngarbo Ri, Mainquka, Bümo La aser Namkapub Ri lir. Ajisüaka iba osang nungji Arunachal nung tesem trokjibo metetdakja mali.
Beijing nung Minzu University of China professor, Xiong Kunxin-i, “China-i South Tibet (Arunachal) indang geography angatetba aser agizüktetba mapang ka nung item tenüng jaloktsür. Item tesem nüngja jaloktsüba ya South Tibet nung China litsü tashi atema agiba mera ka lir,” ta metetdaktsü.
“Item nüngja ya akhidang nungi liasü saka tamalen mebenteti liasü. Anungji item nüngja sangdongbaji tai metongshiba ka mesüka lir,” ta Tibet Academy of Social Sciences nung researcher, Guo Kefan-i ashi.
Paisa, “Sobaliba aser geography nung ajemdaker nüngja bentetbaji ajanga tarutsü nung India aser China tsüngda arrtsü onük jembidang süoksema jembitsü,” ta ashi.
Arunachal Pradesh semdangtsü atema India-i Dalai Lama nem temelaba agütsüba ashishia April 5, 2017 nü China Foreign Ministry-i India aija liasü.
China Foreign Ministry nung otongdar rongnung ka, Hua Chunying-i, “Dalai Lama-i Arunachal Pradesh semdangba ajanga China onüktem kongshir aser China-India tesendaktep kongshir,” ta ashi.
Hua-isa, China aser India na tsüngda mangatettep aloiba tesem ka nung pa jaokba ajanga India-i Tibet dak sentakaba onüktem raksatsüba dang masü saka arrtsü mangatettep tamajungba kümdaktsür, ta ashi.