China-i Arunachal anasa Expressway tasen ka lapok

Beijing, October 1 (Agencies): Deobarnü China-i India kübok Arunachal Pradesh den arrtsü anasa kilometer 409 talang expressway ka lapokogo.
Iba lenmang ajanga Tibet indang yimtiba Lhasa den Nyingchi sendakteper, ta Xinhua news agency ajanga metetdaktsü.
Yimti tulu ana sendaktepba toll-free expressway ji sen $5.8 billion endoka yanglu aser yimti anaji tourist temi kanga sapuba tesemtem lir. Iba lenmang ajanga Lhasa aser Nyingchi na tsüngda ghonda 8 agia senzüba nungi ghonda 5 dang akümer, ta Xinhua-isa ashi.
Tibet nung aliba expressway teimbaka military equipment belentsü atema amshitettsü aser iba ajanga China sepaitem nem maongka agütsür.
China-i Tibet nung infrastructure kanga renlokba ajanga India-ia par litsü nung infrastructure development inyaktsü tenzükogo.
Tanü lapokba Lhasa-Nyingchi expressway nung truck tulutem senzübabo nokdanga lir, ta Xinhua-isa metetdaktsü.
August 28, 2017 nü China aser India nati Sikkim sector nung aliba Doklam tesem nung tekong merangtepba anentsü telemtetba agi.
China-i Doklam tesem nung gari lenmang ka yangluba nokdangtsü atema taküm June ita India sepaitem iba tesemi ao aser iba mapang nung linük ana tsüngda mepetmesü adoka tekong merangtepa aru.