China-i Canada nunger ka nem tasüba temerenshi agütsü

Beijing, Aenjeti/Jan. 14 (Agencies): Miim mozü shibelenba yong China nung court kati Canada nunger ka nem tasüba temerenshi agütsü, aser iba obendang ajanga linük ana tsüngta tesendaktep tamajungba akümtsü südi.
2016 küm Robert Lloyd Schellenberg ya tepuokdak küm 15 ayutsü obendang agüja liasü, saka 2018 küm mepeshiba sülen court kati iba temerenshi kanga tila ta ashi.
US-i mepeshiba nung ajemdaker Canada-i China nunger telecom, Huawei ketdangser Meng Wanzhou pur mapang tatsüka dang lir iba obendang ya agütsü.
La ya Luchii/December nung bail nung chiok.
Arishi küm 46 tain, Meng ya Huawei company tenzüksanger jala lir aser la apuba ajanga China jashi aser Canada o US den tesendaktep mejungi aküm.
China-i iba sülen Canada senso ana pua lir aser parnoki national security lendongi yoker, ta tai tonglokja lir.
Schellenberg ya 2014 küm apu aser methamphetamine gram 200 shibelen ta tai tongloktsü.
2016 Yimpoksüi/November nung pa ya tepuokdak küm 15 ayutsü obendang agütsü.
Saka iba ken o jembishitsü mepeshiba sülen Dalian yimti nung aliba high court kati Canada senso nem Tentonü tasüba temerenshi agütsü.
Court ajangasa pa indang senotsü ajunga meshizüka ayutsüla, ta obendang agütsüogo.
“Ni miim mozü shibelener masü. Ni China-i raliwalir ka ama aru,” ta Schellenberg-i court nung shia liasü, ta osang ajanga ashi.