China-i Cyprus sorkar nungita yaritsü nangzüker: Wang

Nicosia, December 21 (Agencies): Kin kidong mangatettep ken o nung ajemdaker telemsa adoka aliba nübur tanaben sentakteptshija lungjemtsütsü maparen nung Cyprus sokar nungita yaritsü tenangzükba olen ka China Foreign Minister, Wang Yi-i tanü Hombar nü metetdaktsüogo.

Mediterranean tzüyim nung tentetba asetkong linük, Cyprus ya tongti shishilembadak ka kümdaktsütsü alizüng ayuba olena pai metetdaktsü.

Wang-i tanü Cyprus semdanga Cyprus Foreign Minister, Ioannis Kasoulides den ajurutepa senden ka amendang iba tenangzüngba olen ya metetdakja liasü.

Tesüiba mapang, 1974 küm nungi tenzüka nübur rong nung telemsa adokba linük, Cyprus’er mangatettepbaren tajungba kümdaktsütsü nükjidong nung US, Russia aser Britain nungi Foreign Minister-temi Cyprus semdangba sülen Wang-ia tan Cyprus semdanger lir.

“China-i ozü khuret angatetta ozü sorkar nungita yaritsü nangzükba atema kanga pelar,” ta Kasoulides-ia metetdaktsü.

United Nations Security Council (UNSC)-i ketdangsüa par Cyprus nung yimjung tezüngzüktep agitsü aser kasaji mapa küma benshitsü awashi südaktsünüba olen ka Cyprus sorkari taoba mapang metetdakja lir.