China-i Dalai Lama shimbaren nung teka mamoktsüla: Sangay

Dharmsala, September 01 (Agencies): China-i Tibetan Autonomous Region tenteter küm 50 abensaba benjungmong amongtsü nungdak madokba olen ka bendanglen jenokba Tibet sorkar Ato Kilonser, Lobsang Sangay-i tanü Mongolbar nü metetdaktsüogo.

“Tanü anogo ya benjung amongtsü anogo ka masü kechiyong China-i taoba mapang peisasa pei madak yimsü asütsü temeten abenba Tibet tashiyim agi amokbangtsü tenzüker küm 50 shi aruba tejashitsü anogo ka lir,” ta tang India nung jenoka alisang, Sangay-i kanga jashia ashi.

Akidang nungi tenzüka Tibet ya China yimli kübok densema aruba osang ka China-i taküm küm tetenzüklen metetdaktsü saka Tibet nüburtemi iba olenji magizüki lir.

World War II tongpang nung Japan-i tamakok ngur küm 70 abensaba bilemteta China-i benjungmong sentong tulu ayonga aliba mapang ka nung Sangay-i tanü iba olenji sangoktsür lir.

Ano, Tibet nunger tanülar lenisang, Dalai Lama temelenzüker shimbaren nung China-i teka mamoktsü olen ka Sangay-i metetdaktsü.

China-i taruba Dalai Lama China linük nung alir rong nungi shimtsü sentong renemba osang ka angazükba sülen pai iba olenji metetdaktsü.

Paisa ashiba agi, Dalai Lama-i tanaben soa pasasa pa melenzüker tetemtsü shimer ta Tibet nung alir Buddhist tamangba yimsü benshirtem tamangba lir.